បុរសអាមេរិកត្រូវឃ្មុំទិច ២ ០០០ ទ្រនិច នៅទីលានវាយកូនគោល

កាលពីថ្ងៃសៅរ៍ ទី១៩ ខែសីហា បុគ្គលិកថែទាំទីលានវាយកូនគោល Pebblebrook នៃរដ្ឋ Arizona ម្នាក់ ត្រូវសត្វឃ្មុំទិចមួយសំបុកធំ បណ្ដាលឲ្យចូលពេទ្យជាបន្ទាន់ ។

យោងតាមមន្ត្រីមកពី Arizona Fire and Medical Authority (AFMA) បានឲ្យដឹងថា បុរសនោះអាយុប្រហែល ៥០ ឆ្នាំ ត្រូវបានឃ្មុំទិចជិត ២ ០០០ ទ្រនិចឯណោះ ។

នៅពេលអ្នកពន្លត់អគ្គីភ័យបានចូលទៅជិតដើម្បីជួយដំបូង ពួកគេស្មានថាគាត់ត្រូវបានគ្របដណ្ដប់ដោយស្មៅ ការពិតឃ្មុំកំពុងរុំព័ទ្ធគាត់ឡើងជិត ។

យ៉ាងណាមិញ គេមិនទាន់ដឹងពីរបៀបដែលឃ្មុំមកវាយប្រហារគាត់ទេ ប៉ុន្តែក្រុមអ្នកពន្លត់អគ្គីភ័យបានស្លៀកពាក់ឯកសណ្ឋានការពារឃ្មុំ រួច​​ប្រើ​ថ្នាំ​ដើម្បី​កម្ចាត់​ឃ្មុំ ទើបអាចចូល​ជួយ​សង្គ្រោះ​បុរស​នោះបាន ។

បើគិតត្រឹមថ្ងៃច័ន្ទ ទី២១ បុរសខាងលើមានសុវត្ថិភាពហើយកំពុងសម្រាកព្យាបាលនៅមន្ទីរពេទ្យនៅឡើយទេ ។

គួរឲ្យដឹងដែលថា មនុស្សប្រហែល ៦០ នាក់បានស្លាប់ដោយសារឃ្មុំទិចជារៀងរាល់ឆ្នាំ នេះបើតាមទិន្នន័យរបស់ CDC ។ មិនតែប៉ុណ្ណោះ ជាង ៨០ ភាគរយនៃជនរងគ្រោះគឺជាបុរសទៀតផង ៕

ប្រែសម្រួល៖ វារី

ប្រភព៖ usatoday

ចុចអាន៖ អត្ថប្រយោជន៍នឹកស្មានមិនដល់ពី ទឹកដោះស្ដេចឃ្មុំ