លម្អិតអំពីបុគ្គលសំខាន់៥នាក់ នៅក្នុងយន្តហោះរបស់មេទាហានស៊ីឈ្នួលរុស្ស៊ី ដែលធ្លាក់

បើយោងតាមអាជ្ញាធរអាកាសចរណ៍រុស្ស៊ីបានឲ្យដឹងថា ក្រៅពីលោក Yevgeny Prigozhin និងដៃស្តាំរបស់គាត់ឈ្មោះ Dimitry Utkin ក៏មានអ្នកដំណើរ ៥ នាក់ផ្សេងទៀតផងដែរនៅលើយន្តហោះឯកជន Embraer Legacy 600 ហើយអ្នកទាំងនោះមានដូចជា៖

១. Valeriy Chekalov

Chekalov គឺជាជំនិតរបស់លោក Prigozhin ហើយនៅជាមួយមេដឹកនាំក្រុមទាហានស៊ីឈ្នួល Wagner ចាប់តាំងពីទសវត្សរ៍ឆ្នាំ២០០០មកម្ល៉េះ។

គាត់មិនត្រឹមតែទទួលបន្ទុកផ្នែកភស្តុភាររបស់ក្រុម Wagner ប៉ុណ្ណោះទេ គាត់ក៏ជាអ្នកត្រួតពិនិត្យលើកិច្ចសន្យារបស់ Prigozhin ដែលផ្គត់ផ្គង់អាហារដល់យោធា ក៏ដូចជាគម្រោងក្រៅប្រទេសដែលពាក់ព័ន្ធនឹងការរុករកភូមិសាស្ត្រ ការផលិតប្រេង ឬកសិកម្មផងដែរ។

លោក Chekalov គឺជាគោលដៅនៃ​ការ​ដាក់​ទណ្ឌកម្ម​របស់​សហរដ្ឋ​អាមេរិក ដោយសារតែគាត់​ធ្វើការ​ជំនួសឲ្យលោក Prigozhin និង​ការ​ផ្គត់ផ្គង់​អាវុធ​ដល់​រុស្ស៊ី។

២. Yevgeny Makaryan

យោងតាមគេហទំព័រស៊ើបអង្កេត Dossier Center បានឲ្យដឹងថា អតីតមន្ត្រីប៉ូលិសស្រុក Makaryan បានចូលរួមជាមួយក្រុមទាហាន Wagner ក្នុងខែមីនាឆ្នាំ២០១៦។

គាត់បានប្រយុទ្ធឲ្យក្រុមទាហានស៊ីឈ្នួលនៅក្នុងប្រទេសស៊ីរី ហើយគាត់មានរហស្សនាមថា “Makar”។

៣. Sergey Propustin

ក្នុងនាមជាអ្នកប្រយុទ្ធ Wagner ចាប់តាំងពីឆ្នាំ២០១៥មក, Propustin មានរហស្សនាមថា “Kedr” ហើយក៏ធ្លាប់បានប្រយុទ្ធនៅក្នុងសង្រ្គាម Chechen លើកទីពីរផងដែរ។

គាត់មកពីអង្គភាពដែលផ្គត់ផ្គង់អង្គរក្សផ្ទាល់ខ្លួនជាច្រើននាក់ទៅឲ្យលោក Prigozhin។

៤. Alexander Totmin

Totmin គឺមកពីក្រុមទាហានស៊ីឈ្នួលរុស្ស៊ី ដែលគេស្គាល់ច្បាស់ដោយសារជីវិតឡូយឆាយរបស់គាត់។

៥. Nikolay Matuseev

Nikolai Matusevich ក៏មកពីក្រុមទាហានស៊ីឈ្នួលរុស្ស៊ីដែរ ដែលបានប្រយុទ្ធឲ្យ Wagner ចាប់តាំងពីឆ្នាំ២០១៧មក។

គួរបញ្ជាក់ជាថ្មីថា គ្រោះថ្នាក់នេះបានកើតឡើងនៅជិតភូមិ Kuzhenkino ក្នុងតំបន់ Tver ភាគពាយ័ព្យ បន្ទាប់ពីយន្តហោះបានចាកចេញពីអាកាសយានដ្ឋាន Sheremetyevo នៃទីក្រុងមូស្គូ ដើម្បីធ្វើដំណើរទៅកាន់ទីក្រុង St. Petersburg ៕

ប្រែសម្រួល៖ Vann Vann

ប្រភព៖ BBC

ចុចអាន៖ ក្រៅពីលោក Prigozhin នៅមានបុគ្គលសំខាន់ច្រើននាក់ទៀត ស្ថិតក្នុងបញ្ជីអ្នកជិះយន្តហោះដែលធ្លាក់