តើលោក សេតថា ប្ដេជ្ញាដឹកនាំប្រទេសថៃយ៉ាងណាខ្លះ ក្រោយក្លាយជា​នាយករដ្ឋមន្ត្រី?

បន្ទាប់ពីព្រះមហាក្សត្រថៃ មហា វ៉ាជីរ៉ាឡុងកន បានសម្រេចត្រាស់បង្គាប់ និងចេញព្រះរាជក្រឹត្យតែងតាំងជានាយករដ្ឋមន្ត្រីរបស់ប្រទេសជាផ្លូវការកាលពីថ្ងៃពុធហើយនោះ លោក សេតថា ថាវីស៊ីន ក៏បានថ្លែងពីការប្ដេជ្ញាចិត្តក្នុងការដឹកនាំប្រទេសជាតិផងដែរ ។

លោក សេតថា បានថ្លែងប្រាប់ប្រជាពលរដ្ឋថា “ខ្ញុំ​នឹង​ធ្វើ​ការ​ដោយ​សុចរិត​ភាព ផ្តល់​អាទិភាព​ដល់​ផលប្រយោជន៍​ជាតិ និង​ប្រជាជនជាធំ ជាពិសេសខ្ញុំ​មាន​ទំនុក​ចិត្ត​ថា ៤ ​ឆ្នាំ​ខាង​មុខ​នឹង​ជា​ឆ្នាំ​នៃ​ការ​ផ្លាស់​ប្តូ​រ​ ដោយសារតែប្រទេស​ថៃកំពុង​ប្រឈម​មុខ​នឹង​បញ្ហា​​នានា​ទាក់ទងទៅ​នឹង​សេដ្ឋកិច្ច សង្គម បរិស្ថាន​វិទ្យា អំពើ​ពុករលួយ និង​វិសមភាព” ។

អតីតឧកញ៉ាអចលនទ្រព្យរូបនេះបញ្ជាក់ថា “ខ្ញុំចង់អនុវត្តគោលនយោបាយផ្សេងៗដែលត្រូវបានរៀបចំឡើងដើម្បីដោះស្រាយវិបត្តិ កាត់បន្ថយបញ្ហា ជំរុញកំណើន និងការផ្លាស់ប្តូរនៅកម្រិតជីវភាពរស់នៅរបស់ក្រុមគ្រួសារនីមួយៗផងដែរ” ។

នាយករដ្ឋមន្ត្រីជាប់ឆ្នោតវ័យ ៦១ ឆ្នាំរូបនេះសង្កត់ធ្ងន់ថា “ខ្ញុំ សេតថា ថាវីស៊ីន នឹងធ្វើការដោយមិនខ្លាចនឿយហត់ ហើយនឹងក្លាយជារដ្ឋាភិបាលដែលខិតខំបំពេញតួនាទីការងារ និងស្តាប់ប្រជាជន ដើម្បីនាំមកនូវភាពសុខដុមរមនាក្នុងសង្គម ជំរុញប្រទេសថៃឆ្ពោះទៅមុខ និងកសាងអនាគតដ៏ល្អប្រសើរសម្រាប់កូនៗរបស់យើង” ។

គួរបញ្ជាក់ថា លោក សេតថា ថាវីស៊ីន បេក្ខភាពមកពីគណបក្សភឿថៃ ត្រូវបានសមាជិករដ្ឋសភា និងព្រឹទ្ធសភាបោះឆ្នោតជ្រើសរើសជានាយករដ្ឋមន្ត្រីទី ៣០ របស់ប្រទេសជាមួយនឹងសំឡេងគាំទ្រចំនួន ៤៨២, ប្រឆាំង ១៦៤ និងអនុបវាទចំនួន ៨១ សំឡេង ក្នុងចំណោមសមាជិកសភាទាំងពីរដែលមានចំនួនសរុប ៧២៨ រូប ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ គោលនយោបាយ ៨ ចំណុចរបស់ បក្សភឿថៃ សម្រាប់ការដឹកនាំប្រទេស ក្រោយជាប់ឆ្នោតជានាយករដ្ឋមន្ត្រី