លោក ប្រាយុទ្ធ នាំនាយករដ្ឋមន្ត្រីថ្មីដើរមើលកន្លែងធ្វើការនៅវិមាន​រដ្ឋាភិបាល

នាយក​រដ្ឋមន្ត្រី​​ផុត​អាណត្តិ​ថៃលោក ប្រាយុទ្ធ ចាន់អូចា នៅថ្ងៃព្រហស្បតិ៍នេះបានទទួល​ស្វាគមន៍ និងផ្ដល់បាច់ផ្កាដល់នាយករដ្ឋមន្ត្រីជាប់ឆ្នោតថ្មីលោក សេតថា ថាវីស៊ីន នៅវិមានរដ្ឋាភិបាល និងបានជួបពិភាក្សាគ្នាអស់រយៈពេលជិត ១ ម៉ោងផងដែរ ។

ទន្ទឹមនោះ ក្រោយបញ្ចប់កិច្ចពិភាក្សាហើយ លោក ប្រាយុទ្ធ បាននាំលោក សេតថា ទៅមើលកន្លែងបំពេញការងារ ក៏ដូចជាអគារមួយចំនួនផងដែរ រួមមានអគារ Thai Khufah ដែលជាទីស្នាក់ការនាយករដ្ឋមន្ត្រី និងអគារ Bhakdi Bodin ជាបន្ទប់សម្រាប់ទទួលភ្ញៀវផងដែរ ។

បន្ទាប់ពីជំនួបនេះហើយ លោក ប្រាយុទ្ធ បានជូនដំណើរលោក សេតថា ទៅកាន់យានជំនិះដែលនឹងធ្វើដំណើរទៅកាន់ទីស្នាក់ការគណបក្សភឿថៃ ខណៈនាយករដ្ឋមន្ត្រីជាប់ឆ្នោតថ្មី ក៏បានលើកគោរពអរគុណ និងសំពះលាលោក ប្រាយុទ្ធ ទាំងទឹកមុខញញឹមផងដែរ ។

គួរបញ្ជាក់ថា លោក សេតថា ថាវីស៊ីន បេក្ខភាពមកពីគណបក្សភឿថៃ ត្រូវបានសមាជិករដ្ឋសភា និងព្រឹទ្ធសភាបោះឆ្នោតជ្រើសរើសជានាយករដ្ឋមន្ត្រីទី ៣០ របស់ប្រទេសជាមួយនឹងសំឡេងគាំទ្រចំនួន ៤៨២, ប្រឆាំង ១៦៤ និងអនុបវាទចំនួន ៨១ សំឡេង ក្នុងចំណោមសមាជិកសភាទាំងពីរដែលមានចំនួនសរុប ៧២៨ រូប ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ តើលោក សេតថា ប្ដេជ្ញាដឹកនាំប្រទេសថៃយ៉ាងណាខ្លះ ក្រោយក្លាយជា នាយករដ្ឋមន្ត្រី?