អាមេរិក ប្រកាសកាលបរិច្ឆេទ បង្វឹកពីឡុតអ៊ុយក្រែន បើកយន្តហោះចម្បាំង F-16

មន្ទីរបញ្ចកោណបានប្រកាសនៅថ្ងៃព្រហស្បតិ៍ទី២៤ខែសីហាថា ខ្លួននឹងចាប់ផ្តើមបណ្តុះបណ្តាលអ្នកបើកយន្តហោះចម្បាំង F-16 របស់អ៊ុយក្រែននៅសហរដ្ឋអាមេរិក ចាប់ពីខែក្រោយទៅ ដូច្នេះពួកគេអាចប្រើប្រាស់យន្តហោះទំនើបប្រឆាំងនឹងកងកម្លាំងរុស្ស៊ីបានហើយ ខណៈអ៊ុយក្រែនបានខិតខំសុំយន្តហោះចម្បាំងស៊េរីទំនើបទាំងនេះ ដើម្បីប្រយុទ្ធប្រឆាំងនឹងការវាយលុករបស់រុស្ស៊ីជាយូរណាស់មកហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យមន្ទីរបញ្ចកោណ លោក Pat Ryder បាននិយាយថា ការហ្វឹកហ្វឺនរបស់សហរដ្ឋអាមេរិក នឹងរួមបញ្ចូលអ្នកបើកយន្តហោះជាច្រើននាក់ ព្រមទាំងបុគ្គលិករាប់សិបនាក់ដើម្បីថែទាំយន្តហោះផងដែរ។

លោកនិយាយថា “អាកាសយានិកទាំងនេះ នឹងត្រូវបង្រៀនភាសាអង់គ្លេសនៅឯមូលដ្ឋានទ័ពអាកាស Lackland ក្នុងទីក្រុង San Antonio នៃរដ្ឋតិចសាស់ នាខែកញ្ញា មុនពេលចូលរួមការហ្វឹកហាត់ហោះហើរ F-16 នៅរដ្ឋ Arizona នៅខែបន្ទាប់ ខណៈការហ្វឹកហ្វឺនក្នុងរដ្ឋ Arizona នឹងធ្វើឡើងនៅមូលដ្ឋានឆ្មាំជាតិ Morris Air” ។

លោកសង្កត់ធ្ងន់ថា ជាធម្មតា ការបណ្តុះបណ្តាល មានរយៈពេលពី ៥ ទៅ ៨ ខែ អាស្រ័យលើជំនាញដែលអ្នកបើកយន្តហោះមានរួចហើយ។

ស្របពេលជាមួយគ្នានោះ បើយោងតាមសេតវិមាន, លោកប្រធានាធិបតី Joe Biden និងសមភាគីអ៊ុយក្រែ Volodymyr Zelenskyy ក៏បានពិភាក្សាគ្នាផងដែរ​ អំពីកម្មវិធីបណ្តុះបណ្តាលនេះ។

គួរបញ្ជាក់ជាថ្មី កាលពីសប្តាហ៍មុន សហរដ្ឋអាមេរិកបានប្រាប់ប្រទេសដាណឺម៉ាក និងហូឡង់ថា ពួកគេអាចផ្ទេរយន្តហោះចម្បាំង F-16 ទៅឲ្យទីក្រុងកៀវបាន នៅពេលណាអាកាសយានិករបស់អ៊ុយក្រែន ត្រូវបានបណ្តុះបណ្តាលរួចរាល់៕

ប្រែសម្រួល៖ Vann Vann

ប្រភព៖ CNA

ចុចអាន៖ គូប្រជែងលោក បៃដិន ថា មនុស្សជាតិនឹងជួបមហន្តរាយ ពេល F-16 ទៅដល់ដៃ អ៊ុយក្រែន