​រកឃើញអដ្ឋិធាតុស្វា​យក្ស​​ផុត​ពូជ​ ​នៅ​ប្រទេស ​វៀតណាម

អ្នកវិទ្យាសាស្ត្របានរកឃើញអដ្ឋិធាតុរបស់សត្វស្វាយក្សដែលផុតពូជនៅក្នុងខេត្ត Thanh Hoa ភាគកណ្តាល ប្រទេសវៀតណាម ។

ការរកឃើញនេះ គឺជាសំណល់តែមួយគត់នៃសម័យ Pleistocene ដែលមិនធ្លាប់មាននៅក្នុងប្រទេសវៀតណាម ធ្វើឡើងដោយអ្នកជំនាញមកពីវិទ្យាស្ថាន Borissiak បុរាណវិទ្យា ក្រោមបណ្ឌិត្យសភាវិទ្យាសាស្ត្ររុស្ស៊ី នៅទីក្រុង Moscow ក៏ដូចជាមជ្ឈមណ្ឌលវិទ្យាសាស្ត្រ និងបច្ចេកវិទ្យាត្រូពិចរុស្ស៊ី-វៀតណាម នៅទីក្រុងហាណូយដែរ ។

ចាប់ពីឆ្នាំ ២០២០ ដល់ឆ្នាំ ២០២២ អ្នកវិទ្យាសាស្ត្របានរកឃើញធ្មេញរបស់សត្វស្វាយក្ស (Gigantopithecus blacki) នៅរូងភ្នំ Lang Trang ក្នុងស្រុក Ba Phuoc នៃខេត្ត Thanh Hoa ។ ទាំងនេះគឺជាការរកឃើញចុងក្រោយបង្អស់ដែលត្រូវបានកត់ត្រាសម្រាប់ប្រភេទសត្វដែលផុតពូជតាំងពីប្រហែល ១២៥ ០០០ ឆ្នាំមុន។

គួរជម្រាបថា ថនិកសត្វ Gigantopithecus គឺជាសត្វដ៏ធំបំផុត ហើយអាចមានទម្ងន់ប្រហែល ២០០ ទៅ ៣០០ គីឡូក្រាមឯណោះ ។ ស្វាយក្សទាំងនេះរស់នៅក្នុងព្រៃនៃអាស៊ីអាគ្នេយ៍ មុនពេលផុតពូជរាប់រយពាន់ឆ្នាំមុន ។

ផូស៊ីលរបស់ពួកវាគឺកម្រណាស់ ហើយមានតែសំណល់បុរាណមួយចំនួនប៉ុណ្ណោះត្រូវបានរកឃើញនៅក្នុងរូងភ្នំថ្មកំបោរនៃភាគខាងត្បូង ប្រទេសចិន ។

ក្រៅពីអដ្ឋិធាតុរបស់ស្វាយក្ស អ្នកវិទ្យាសាស្ត្រក៏បានរកឃើញអដ្ឋិធាតុនៃសត្វចំនួន ៤១ ប្រភេទផ្សេងទៀតនៅក្នុងរូងភ្នំ Lang Trang ដែរ រួមមាន ខ្លារខិន ប្រចៀវ រមាស និងជ្រូកព្រៃជាដើម ៕

ប្រែសម្រួល៖ វារី
ប្រភព៖ vnexpress

ចុចអាន៖ ក្មេងប្រុសម្នាក់រកឃើញផូស៊ីលអាយុកាល ២០០ លានឆ្នាំ នៅឆ្នេរ Llantwit Major