ផ្លូវការ! ទីបំផុត រុស្ស៊ី ប្រកាសថា លោក Prigozhin ពិតជាស្លាប់មែន

នៅទីបំផុត មន្ត្រីរុស្ស៊ីប្រកាសថា ប្រធានក្រុមហ៊ុនទាហានស៊ីឈ្នួល Wagner លោក Yevgeny Prigozhin ត្រូវបានបញ្ជាក់ថាស្លាប់ បន្ទាប់ពីការវិភាគហ្សែននៃសាកសពដែលគេរកឃើញនៅកន្លែងធ្លាក់យន្តហោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈកម្មាធិការស៊ើបអង្កេត (SK) និយាយថា អត្តសញ្ញាណជនរងគ្រោះទាំង១០នាក់ ត្រូវបានបញ្ចេញ ហើយត្រូវគ្នាទៅនឹងអ្នកដែលមានឈ្មោះនៅក្នុងបញ្ជីធ្វើដំណើររបស់យន្តហោះ។

គួរបញ្ជាក់ជាថ្មី យន្តហោះឯកជនរបស់លោក Prigozhin បានធ្លាក់នៅភាគពាយព្យទីក្រុងមូស្គូកាលពីថ្ងៃទី២៣ខែសីហា ដោយបានសម្លាប់មនុស្សទាំងអស់ដែលជិះក្នុងនោះ។

ទោះបីជាយ៉ាងណាក៏ដោយ​ វិមានក្រឹមឡាំង បានបដិសេធចំពោះការចោទប្រកាន់ដែលថា​ ខ្លួនជាប់ពាក់ព័ន្ធនឹងហេតុការណ៍នោះ។

ជនរងគ្រោះរួមមានឥស្សរជនជាន់ខ្ពស់មួយចំនួននៅក្នុងក្រុម Wagner ដែលជាក្រុមទាហានស៊ីឈ្នួលរុស្ស៊ី បង្កើតឡើងដោយលោក Prigozhin និងបានចូលរួមក្នុងប្រតិបត្តិការយោធានៅប្រទេសអ៊ុយក្រែន ស៊ីរី និងផ្នែកខ្លះនៃទ្វីបអាហ្វ្រិក។

ក្នុងចំណោមពួកគេក៏មានបុរសឈ្មោះ Dmitry Utkin ដែលគ្រប់គ្រងប្រតិបត្តិការយោធារបស់ Wagner ផងដែរ។

អ្នកផ្សេងទៀតនៅលើយន្តហោះ Embraer Legacy ដែលហោះហើរចេញពីទីក្រុងមូស្គូទៅកាន់ St Petersburg រួមមានសមាជិក Wagner ឈ្មោះ Valery Chekalov, Sergei Propustin, Yevgeny Makaryan, Alexander Totmin និង Nikolay Matuseyev។

រី​ឯអ្នកផ្សេងទៀតរួមមានពីឡុតឈ្មោះ Alexei Levshin និងជំនួយការ Rustam Karimov ព្រមទាំងនារីអូតែស Kristina Raspopova៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក ពូទីន បញ្ជាឲ្យកូនទាហានស៊ីឈ្នួល ធ្វើសច្ចាប្រណិធាន ក្រោយ Prigozhin ធ្លាក់យន្តហោះ