ព័ត៌មានអន្ដរជាតិ

មេពន្ធនាគារ ថៃ ប្រាប់បែបបទដែលលោក ថាក់ស៊ីន អាចសុំការលើកលែងទោសពីព្រះមហាក្សត្រ

បានផុស

២ years មុន

នៅ

ថ្ងៃចន្ទ ២៨ សីហា ២០២៣

ដោយ

អាជ្ញាធរអប់រំកែប្រែថៃបានអះអាងថា អតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត់ត្រា អាចស្វែងរកការលើកលែងទោសពីព្រះមហាក្សត្រ បើទោះបីជាមានអ្នកប្រឆាំងនឹងសំណើបែបនេះក៏ដោយ ។

លោក Nastee Thongplad ប្រធានពន្ធនាគារ Remand របស់ទីក្រុងបាងកក បាននិយាយកាលពីថ្ងៃអាទិត្យថា លោក ថាក់ស៊ីន គឺដូចអ្នកទោសផ្សេងៗទៀតផងដែរ ដោយមានសិទ្ធិស្វែងរកការលើកលែងទោសពីព្រះមហាក្សត្រ ប៉ុន្តែទាំងលោក និងក្រុមគ្រួសារត្រូវតែរៀបចំបែបបទ ក៏ដូចជាហេតុផលគ្រប់គ្រាន់ដើម្បីគាំទ្រសំណើនេះ ។

ពាក់ព័ន្ធនឹងបញ្ហានេះដែរ លោក Nastee បានបញ្ជាក់ថា ពាក្យស្នើសុំលើកលែងទោសពីព្រះមហាក្សត្រ ត្រូវចាប់ផ្ដើមពីពន្ធនាគាររបស់អ្នកដាក់ញត្តិ ហើយអាជ្ញាធរពន្ធនាគារនឹងពិនិត្យមើលញត្តិជាលាយលក្ខណ៍អក្សរនោះ រួចបញ្ជូនបន្តទៅនាយកដ្ឋានអប់រំកែប្រែ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់មកញត្តិនឹងបញ្ជូនបន្តទៅក្រសួងយុត្តិធម៌ លេខាធិការដ្ឋានខុទ្ទកាល័យ និងចុងក្រោយបញ្ជូនទៅការិយាល័យលេខាធិការឯកជនរបស់ព្រះមហាក្សត្រ ដើម្បីពិនិត្យ និងលើកយកមកពិចារណា ។

ទន្ទឹមនោះ ក្រោយពេលដែលមានទម្រង់បែបបទស្នើសុំការលើកលែងទោសពីព្រះមហាក្សត្ររួចហើយ អ្នកដាក់ញត្តិនឹងត្រូវបង្ហាញឯកសារផ្សេងទៀត ដើម្បីបញ្ជាក់ពីការរួមចំណែកជួយជាតិនាពពេលកន្លងមក និងកំណត់ត្រាការព្យាបាលវេជ្ជសាស្រ្តជាដើម ។

គួរបញ្ជាក់ថា លោក ថាក់ស៊ីន ត្រូវបានតុលាការកំពូលផ្ដន្ទាទោសដាក់ពន្ធនាគាររយៈពេល ៨ ឆ្នាំក្នុងសំណុំរឿងផ្លូវច្បាប់ចំនួន ៣ ករណី បន្ទាប់ពីចុះចតភ្លាមៗនៅទីតាំង VIP មួយកន្លែងក្នុងព្រលានយន្តហោះដនមឿងរបស់ទីក្រុងបាងកក ក្រោយសម្រេចវិលត្រលប់ចូលស្រុកវិញកាលពីថ្ងៃទី២២ ខែសីហា ៕