អ្នកគ្រូនៅ ឥណ្ឌា បញ្ជាឲ្យកូនសិស្សទះកំផ្លៀងមិត្តរួមថ្នាក់ដែលកាន់សាសនាឥស្លាម

អាជ្ញាធរក្នុងរដ្ឋ Uttar Pradesh របស់ប្រទេសឥណ្ឌា បានបិទសាលារៀនមួយកន្លែង បន្ទាប់ពីគ្រូបង្រៀនរបស់ខ្លួនបញ្ជាឲ្យសិស្សទះកំផ្លៀងមិត្តរួមថ្នាក់ដែលកាន់សាសនាឥស្លាម ។

ក្រុមមន្ត្រីបាននិយាយថា សាលា Neha ត្រូវបិទ ដោយសារតែមិនបំពេញតាមវិន័យរបស់នាយកដ្ឋានអប់រំ ។ ចំណែកឯសិស្សទាំងអស់ត្រូវផ្លាស់ទៅសាលារដ្ឋាភិបាល ឬសាលាផ្សេងទៀតដែលនៅជិតនោះ ខណៈអ្នកគ្រូឈ្មោះ Tripta Tyagi បានប្រាប់ទូរទស្សន៍ NDTV ថា អ្នកគ្រូមិនខ្មាសនឹងទង្វើរបស់ខ្លួននោះទេ ។

ពាក់ព័ន្ធនឹងបញ្ហានេះដែរ ឪពុករបស់ក្មេងប្រុសរងគ្រោះក៏បានរាយការណ៍ប្រាប់ប៉ូលិសហើយផងដែរ ប៉ុន្តែគាត់មិនដាក់ពាក្យបណ្ដឹងឡើយ ។ បើតាមគ្រួសាររបស់ក្មេងប្រុសអាយុ ៧ ឆ្នាំរូបនេះបានឲ្យដឹងថា អ្នកគ្រូបានបញ្ជាកូនសិស្សទះកំផ្លៀងកូនគាត់ គឺគ្រាន់តែធ្វើតារាងលេខគុណខុសប៉ុណ្ណោះ ។

សម្រាប់ករណីខាងលើ ប៉ូលិស​ក៏បាន​កសាង​សំណុំរឿង​ប្រឆាំង​នឹង​អ្នកគ្រូ Tripta Tyagi រួចហើយផងដែរ ប៉ុន្តែ​មិន​ទាន់​ចាប់ខ្លួន​​នៅឡើយ​ទេ ព្រោះ​ការចោទប្រកាន់នេះ ​អាច​នៅ​ក្រៅ​ឃុំបាន ៕

ប្រែសម្រួល៖ វារី

ប្រភព៖ BBC

ចុចអាន៖ ឥណ្ឌា កាត់ទោសជនល្មើស២នាក់ឲ្យជាប់ពន្ធនាគារអស់មួយជីវិត ក្រោយរំលោភនិងសម្លាប់ក្មេងស្រី