ព័ត៌មានអន្ដរជាតិ

តើលោកខាងលិចពិតជាទទួលបានផលប្រយោជន៍ពីការស្លាប់របស់មេទាហានស៊ីឈ្នួល រុស្ស៊ី មែនឬ?

បានផុស

១ year មុន

នៅ

ថ្ងៃអង្គារ ២៩ សីហា ២០២៣

ដោយ

មេទាហានស៊ីឈ្នួលរុស្ស៊ី Wagner Group លោក Yevgeny Prigozhin ត្រូវបានបញ្ជាក់ថាស្លាប់ក្នុងហេតុការណ៍ធ្លាក់យន្តហោះដ៏រន្ធត់នៅភាគពាយព្យនៃទីក្រុងមូស្គូកាលពីថ្ងៃទី២៣ ខែសីហា ពោលរយៈពេល ២ ខែ បន្ទាប់ពីស្ថាបនិករូបនេះដឹកនាំការបះបោរប្រឆាំងនឹងវិមានក្រឹមឡាំង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Prigozhin រួមជាមួយនឹងមនុស្ស ៩ នាក់ផ្សេងទៀតបានស្ថិតនៅលើយន្តហោះឯកជន Embraer Legacy 600 មានលេខកន្ទុយ RA-02795 អំឡុងធ្វើដំណើរទៅកាន់ទីក្រុង St Petersburg ហើយអ្នកវិភាគជាច្រើនបានលើកឡើងថា សោកនាដកម្មស្លាប់មេទាហានស៊ីឈ្នួលរូបនេះ នឹងផ្ដល់ផលប្រយោជន៍ដល់លោកខាងលិច ជាពិសេសនឹងបង្កការគំរាមកំហែងទៅដល់រុស្ស៊ីផងដែរ ។

តើការស្លាប់របស់មេទាហានស៊ីឈ្នួល រុស្ស៊ី ពិតជាផ្ដល់ផលប្រយោជន៍ទៅឲ្យលោកខាងលិចមែនឬ?

ពាក់ព័ន្ធនឹងបញ្ហានេះដែរ អ្នកជំនាញក្រុមវិបត្តិអន្តរជាតិលោក Oleg Ignatov បានប្រាប់សារព័ត៌មាន Anadolu ថា ផលប្រយោជន៍ដែលលោកខាងលិចទទួលបានពីការស្លាប់លោក Prigozhin នោះ ដោយសារតែមេទាហានស៊ីឈ្នួលរុស្ស៊ីរូបនេះ គឺជាសត្រូវដ៏ល្អឥតខ្ចោះ និងជោគជ័យលើដៃគូលោកខាងលិចនៅអាហ្វ្រិក ។

អ្នកជំនាញរូបនេះបញ្ជាក់ថា “រដ្ឋាភិបាលនៅអាហ្វ្រិកជាច្រើនបានសួរនាំអំពីប្រតិបត្តិការ ក៏ដូចជាតម្រូវការមួយចំនួនរបស់ក្រុមទាហានស៊ីឈ្នួល Wagner Group នៅប្រទសអាហ្វ្រិក ហើយជាការពិតណាស់ ប្រសិនបើលោក Prigozhin បាត់ស្រមោល ហើយក្រុម Wagner Group បាត់ខ្លួនតែម្ដងនោះ លោកខាងលិចនឹងទទួលបានអត្ថប្រយោជន៍ពីបញ្ហានេះ” ។

ជាក់ស្ដែងគឺប្រទេសបារាំងតែម្ដងនឹងទទួលបានផលប្រយោជន៍ដ៏ធំធេងនេះ ពីព្រោះក្រុមរបស់លោក Prigozhin ភាគច្រើនប្រយុទ្ធប្រឆាំងនឹងវត្តមានកងកម្លាំងរបស់បារាំងនៅក្នុងប្រទេសអាហ្វ្រិក ហើយប្រតិបត្តិការជោគជ័យបំផុតរបស់ក្រុមទាហានស៊ីឈ្នួល គឺនៅក្នុងប្រទេសអតីតអាណានិគមអាហ្វ្រិក” ។

ចំណែកនៅសហរដ្ឋអាមេរិកវិញ លោកប្រធានាធិបតី Joe Biden ក៏មិនបាននិយាយអ្វីច្រើនទាក់ទិននឹងរឿងរ៉ាវធ្លាក់យន្តហោះនេះនោះដែរ ។ លោក Biden លើកឡើងថា “ខ្ញុំមិនដឹងថាមានអ្វីកើតឡើងនោះទេ ប៉ុន្តែខ្ញុំមិនភ្ញាក់ផ្អើលឡើយ ព្រោះតែមានរឿងរ៉ាវជាច្រើនបានកើតឡើងនៅក្នុងប្រទេសរុស្ស៊ី ហើយរឿងទាំងនោះមានលោក Putin នៅពីក្រោយ” ។

គួរបញ្ជាក់ថា ក្រោយសោកនាដកម្មធ្លាក់យន្តហោះស្លាប់លោក Prigozhin និងបក្ខពួកកាលពីសប្ដាហ៍មុនមក អ្នកវិភាគមួយចំនួនបានលើកឡើងស្រដៀងៗគ្នាថា លោក Putin នេះហើយគឺជាអ្នកបញ្ជាឲ្យធ្វើឃាតមេទាហានស៊ីឈ្នួលរុស្ស៊ី Wagner Group ។ ប៉ុន្តែទោះជាយ៉ាងណា អ្នកនាំពាក្យវិមានក្រឹមឡាំងលោក Dmitry Peskov បានចេញមកបដិសេធរាល់ការវិភាគទាំងនោះ ហើយថែមទាំងលើកឡើងទៀតថា ការអះអាងទាំងអស់គឺជា “ការកុហកទាំងស្រុង” ៕