ព្យុះកំណាច Idalia កំពុងហោះសំដៅទៅរដ្ឋ Florida ខណៈតំបន់ចំនួន៤៩ ត្រូវប្រកាសអាសន្ន

ព្យុះសង្ឃរា Idalia កំពុងបង្កើនឥទ្ធិពលហោះសំដៅទៅរដ្ឋ Florida ដោយនៅទីនោះ ប្រជាជនកំពុងរៀបចំខ្លួន ដើម្បីទប់ទល់នឹងផលប៉ះពាល់ដែលបង្កឡើងដោយព្យុះកំណាចមួយនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមជ្ឈមណ្ឌលព្យុះសង្ឃរាជាតិ, Idalia ត្រូវបានគេរំពឹងថា នឹងពង្រឹងខ្លួនទៅជាព្យុះសង្ឃរាដ៏គ្រោះថ្នាក់មួយ មុនពេលវាបោកបក់លើឆ្នេរនៃឈូងសមុទ្រ Florida នៅថ្ងៃព្រហស្បតិ៍ ទី៣១ ខែសីហានេះ។

មជ្ឈមណ្ឌលនេះបានឲ្យដឹងទៀតថា “រលកសមុទ្រ និងកម្លាំងខ្យល់ខ្លាំង នឹងអាចគំរាមកំហែងដល់អាយុជីវិត នៅពេលវាវាយប្រហារនៅតាមបណ្តោយឆ្នេរសមុទ្រនៅយប់ថ្ងៃពុធ និងព្រហស្បតិ៍” ។

ស្របពេលជាមួយគ្នានោះ អភិបាលរដ្ឋ Florida លោក Ron DeSantis បានប្រកាសដាក់តំបន់ចំនួន ៤៩ ក្នុងគ្រាអាសន្ន ហើយសេចក្តីជូនដំណឹងអំពីការជម្លៀស ត្រូវបានចេញនៅក្នុងស្រុកចំនួន ២៨ ។

ទន្ទឹមនោះ អំឡុងសន្និសីទសារព័ត៌មានមួយកាលពីល្ងាចថ្ងៃអង្គារ លោកបានជំរុញឲ្យប្រជាជន ត្រូវចាកចេញជាបន្ទាន់ ប្រសិនបើពួកគេស្ថិតនៅក្នុងតំបន់ជម្លៀស។ 

យោងតាមការិយាល័យអភិបាលក្រុងបានឲ្យដឹងថា សេវាសាធារណៈនានា ត្រូវបានផ្អាកនៅព្រឹកថ្ងៃអង្គារ តាមបណ្តោយឆ្នេរសមុទ្រភាគខាងលិចនៃរដ្ឋ Florida ហើយជម្រកសុវត្ថិភាពចំនួន ៥០ ត្រូវបានរៀបចំឡើង ស្របពេលដែលសាលារៀនរាប់សិបកន្លែងនៅទូទាំងរដ្ឋ Florida ក៏ត្រូវបិទផងដែរនៅសប្តាហ៍នេះ ៕

ប្រែសម្រួល៖ Vann Vann

ប្រភព៖ CBS News

ចុចអាន៖ ព្យុះ Ida សម្លាប់មនុស្ស ៦០នាក់នៅអាមេរិក