អាស៊ាន អនុម័តឯកសារសំខាន់ៗមុនកិច្ចប្រជុំកំពូលលើកទី ៤៣ នៅ ឥណ្ឌូណេស៊ី

មេដឹកនាំអាស៊ាននឹងត្រូវអនុម័តឯកសារចំនួន ៥ ក្នុងកិច្ចប្រជុំកំពូលលើកទី ៤៣ នៅប្រទេសឥណ្ឌូណេស៊ី ខណៈឯកសារទាំង ៥ នោះគឺទាក់ទងទៅនឹងតំបន់គ្មានពិការភាព ការប្រែប្រួលអាកាសធាតុ សមភាពយេនឌ័រ និងការអភិវឌ្ឍគ្រួសារ ការអប់រំថែទាំកុមារតូចៗ និងការតស៊ូប្រកបដោយនិរន្តរភាពជាដើម ។

លើសពីនេះ ឯកសារចំនួន ២១ ផ្សេងទៀតស្តីពីបញ្ហា សង្គម-វប្បធម៌ ក៏នឹងត្រូវដាក់ជូនក្នុងកិច្ចប្រជុំកំពូលអាស៊ានដែលគ្រោងនឹងធ្វើឡើងនៅថ្ងៃទី ៥-៧ ខែកញ្ញា ខណៈឯកសារទាំងនេះបានរួមចំណែកខ្លាំងមែនទែនដល់ឥណ្ឌូណេស៊ី ដែលជាប្រធានអាស៊ានឆ្នាំនេះ ជាពិសេសកិច្ចប្រជុំលើកទី ៤៣ នោះក៏បញ្ជាក់សារជាថ្មីផងដែរ អំពីអាទិភាពរបស់ខ្លួនក្នុងការពិភាក្សាលើចក្ខុវិស័យអាស៊ានឆ្នាំ ២០៤៥ ។

ចំណែកកិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ាន (ASCC) លើកទី៣០ ដែលបានរៀបចំឡើងរួចទៅហើយនៅទីក្រុងហ្សាកាតាកាលពីថ្ងៃទី២៩ ខែសីហា ក៏បានអនុម័តលើឯកសារចំនួន ៥ ផងដែរ ដែលនឹងត្រូវយកមកពិភាក្សា និងអនុម័តបន្ថែមទៀតនៅក្នុងកិច្ចប្រជុំនោះ ។

បើយោងតាមរដ្ឋមន្ត្រីសម្របសម្រួលសម្រាប់ការអភិវឌ្ឍន៍មនុស្ស និងវប្បធម៌របស់ឥណ្ឌូណេស៊ី លោក Muhadjir Effendy បានឲ្យដឹងថា កិច្ចប្រជុំកំពូលអាស៊ាននៅឥណ្ឌូណេស៊ីក្នុងឆ្នាំនេះ ក៏នឹងពិភាក្សាអំពីបញ្ហាពលករចំណាកស្រុកផងដែរ ។

គួរបញ្ជាក់ថា ប្រទេសឡាវនឹងធ្វើជាប្រធានអាស៊ានបន្តវេនពីឥណ្ឌូណេស៊ីនៅឆ្នាំ ២០២៤  ហើយបន្ទាប់មកម៉ាឡេស៊ីនឹងធ្វើជាប្រធាននៅឆ្នាំ ២០២៥ ខណៈឆ្នាំ ២០២៦ មីយ៉ាន់ម៉ាបានប្រកាសដកខ្លួនចេញពីកៅអីមួយនេះ ដោយសារតែស្ថានភាពវឹកវរនៅក្នុងប្រទេស ក៏ដូចជាមិនទាន់ត្រៀមខ្លួនរួចរាល់នៅឡើយ ហើយត្រូវធ្លាក់ទៅដល់ដៃប្រទេសហ្វីលីពីន ៕

ប្រែសម្រួលដោយ ៖ ជីវ័ន្ត

ប្រភព ៖ Vietnam Plus

ចុចអាន ៖ តើកូនស្រីពៅលោក ថាក់ស៊ីន ស័ក្តិសមនឹងកាន់តំណែងអ្វី?