អ៊ុយក្រែន គំរាមវាយប្រហារចូលជ្រៅ ក្នុងទឹកដីរុស្ស៊ី ក្រោយផលិតបានមីស៊ីលរយៈចម្ងាយឆ្ងាយ

ប្រធានាធិបតីអ៊ុយក្រែន លោក Vladimir Zelensky បាននិយាយកាលពីថ្ងៃព្រហស្បតិ៍ទី៣១ខែសីហាថា ប្រទេសអ៊ុយក្រែនបាននិងកំពុងផលិតអាវុធរយៈចម្ងាយឆ្ងាយ ខណៈមន្ត្រីសន្តិសុខកំពូលរបស់លោកអះអាងថា កម្មវិធីមីស៊ីលថ្មីនេះគឺកំពុងដំណើរការហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zelensky បានបង្ហោះសារនៅក្នុងឆានែល Telegram ថា “ការប្រើប្រាស់អាវុធរយៈចម្ងាយឆ្ងាយរបស់យើងកំពុងទទួលបានជោគជ័យ ហើយគោលដៅនៅចម្ងាយ ៧០០ គីឡូម៉ែត្រក៏ត្រូវបានវាយប្រហារ” ។

បន្តិចក្រោយមក លេខាធិការក្រុមប្រឹក្សាសន្តិសុខ និងការពារជាតិអ៊ុយក្រែន (NSDC) លោក Aleksey Danilov ក៏បានបង្ហោះវីដេអូរយៈពេល ២០ វិនាទីនៅលើបណ្តាញសង្គម X ដែលបង្ហាញពីអ្វី មើលទៅដូចជាមីស៊ីលបាញ់នៅពេលយប់ ។

លោក Danilov និយាយថា “កម្មវិធីមីស៊ីលរបស់ប្រធានាធិបតីអ៊ុយក្រែនកំពុងដំណើរការ។ ការធ្វើតេស្តទទួលបានជោគជ័យ ស្របពេលការអនុវត្តគឺមានប្រសិទ្ធភាព ហើយទាំងទីក្រុង Sevastopol, Kamchatka និងទីក្រុង Kronstadt សុទ្ធតែជាគោលដៅវាយប្រហារ” ។

ពាក់ព័ន្ធនឹងចម្ងាយ ៧០០ គីឡូម៉ែត្រនេះដែរ អាច​ជា​ការសំដៅ​ទៅទី​ក្រុង Pskov ​នៅ​ភាគ​ពាយព្យ​​ប្រទេស​រុស្ស៊ី ។ យន្តហោះដឹកជញ្ជូនយោធាជាច្រើនគ្រឿង ត្រូវខូចខាតនៅអាកាសយានដ្ឋាន Pskov កាលពីព្រឹកថ្ងៃពុធ នៅក្នុងអ្វីដែលអាជ្ញាធរតំបន់ពណ៌នាថា ជាការវាយប្រហារដោយដ្រូនជាង ១០ គ្រឿង ។

លោក Zelensky និង Danilov ក៏ដូចជាមន្ត្រីអ៊ុយក្រែនផ្សេងទៀត បានទទូចម្តងហើយម្តងទៀតថា ពួកគេប្រើតែអាវុធផលិតក្នុងស្រុកប៉ុណ្ណោះ ដើម្បីប្រឆាំងនឹងទឹកដីរុស្ស៊ី ចាប់តាំងពីសហរដ្ឋអាមេរិកនិងសម្ព័ន្ធមិត្ត បានហាមឃាត់ពួកគេមិនឲ្យប្រើមីស៊ីល និងដ្រូនដែលផ្តល់ដោយលោកខាងលិចក្នុងការវាយបកលើរុស្ស៊ី ។

សូមបញ្ជាក់ថា ដំបូងឡើយ អ៊ុយក្រែនបានកំណត់គោលដៅលើទីក្រុងមូស្គូ ជាមួយនឹងដ្រូនក្នុងខែឧសភា ហើយបានចាប់ផ្តើមការវាយប្រហារញឹកញាប់ជាងមុននៅខែកក្កដា៕

ប្រែសម្រួល៖ Vann Vann

ប្រភព៖ RT

ចុចអាន៖ តើពេលណាទើបជម្លោះ រុស្ស៊ី-អ៊ុយក្រែន បញ្ចប់?