តើអ្នកណាចុះហត្ថលេខាអមព្រះមហាក្សត្រ ថៃ លើក្រឹត្យបន្ថូរបន្ថយទោស​លោក ថាក់ស៊ីន?

ព្រះមហាក្សត្រថៃព្រះបាទ មហាវ៉ាជីរ៉ា ឡុងកន កាលពីថ្ងៃសុក្របានសម្រេចព្រះទ័យបន្ថូរបន្ថយទោសដាក់ពន្ធនាគាររបស់អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា ពីរយៈពេល ៨ ឆ្នាំមកនៅត្រឹម ១ ឆ្នាំប៉ុណ្ណោះ ។

ទន្ទឹមនោះ មិនមែនមានត្រឹមតែការឡាយព្រះហត្ថលេខាលើព្រះរាជក្រឹត្យបន្ថូរបន្ថយទោសសម្រាប់លោក ថាក់ស៊ីន ពីសំណាក់ព្រះមហាក្សត្រថៃនោះទេ ប៉ុន្តែក៏នៅមានការចុះហត្ថលេខាអមដោយនាយករដ្ឋមន្ត្រីមួយរូបទៀតផងដែរ ហើយនោះគឺលោក ប្រាយុទ្ធ ចាន់អូចា ដែលជានាយករដ្ឋមន្ត្រីផុតអាណត្តិ ។

ស្របពេលជាមួយគ្នានេះ ព្រះរាជក្រឹត្យបន្ថូរបន្ថយទោសខាងលើដែលសម្រេចព្រះទ័យដោយព្រះមហាក្សត្រ ក៏ត្រូវបានប្រគល់ជូនលោក ថាក់ស៊ីន ភ្លាមៗផងដែរ ខណៈបច្ចុច្បន្នអតីតនាយករដ្ឋមន្ត្រីវ័យ ៧៤ ឆ្នាំរូបនេះកំពុងទទួលការព្យាបាលនៅមន្ទីរពេទ្យប៉ូលិសក្រុងបាងកក ពោលរហូតមកដល់ពេលនេះមានរយៈពេល ១០ ថ្ងៃហើយ បន្ទាប់ពីលោកវិលត្រឡប់ចូលស្រុកវិញ ។

គួរបញ្ជាក់ថា លោក ថាក់ស៊ីន ត្រូវបានតុលាការកំពូលផ្ដន្ទាទោសដាក់ពន្ធនាគាររយៈពេល ៨ ឆ្នាំក្នុងសំណុំរឿងផ្លូវច្បាប់ចំនួន ៣ ករណី បន្ទាប់ពីចុះចតភ្លាមៗនៅទីតាំង VIP មួយកន្លែងក្នុងព្រលានយន្តហោះដនមឿងរបស់ទីក្រុងបាងកក ក្រោយសម្រេចវិលត្រលប់ចូលស្រុកវិញកាលពីថ្ងៃទី២២ ខែសីហា ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ ព្រះមហាក្សត្រ ថៃ កាត់បន្ថយទោសជាប់ពន្ធនាគាររបស់លោក ថាក់ស៊ីន មកត្រឹម១ឆ្នាំ