តើមូលហេតុអ្វីខ្លះទើបព្រះមហាក្សត្រ ថៃ សម្រេចព្រះទ័យបន្ថូរបន្ថយទោស​លោក ថាក់ស៊ីន?

ព្រះមហាក្សត្រថៃព្រះបាទ មហាវ៉ាជីរ៉ា ឡុងកន កាលពីថ្ងៃសុក្របានសម្រេចព្រះទ័យបន្ថូរបន្ថយទោសដាក់ពន្ធនាគាររបស់អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា ពីរយៈពេល ៨ ឆ្នាំមកនៅត្រឹម ១ ឆ្នាំប៉ុណ្ណោះ ។

ស្របពេលជាមួយគ្នានេះ មុនពេលឈានដល់ការសម្រេចព្រះទ័យបន្ថូរបន្ថយទោសលើលោក ថាក់ស៊ីន នោះ ព្រះបាទ មហាវ៉ាជីរ៉ា ឡុងកន ទ្រង់ក៏មានព្រះរាជតម្រិះពិចារណាលើអង្គហេតុ ក៏ដូចជាកត្តាមួយចំនួនផងដែរ ។

ពាក់ព័ន្ធនឹងបញ្ហានេះ ព្រះមហាក្សត្រថៃមានព្រះរាជតម្រិះថា លោក ថាក់ស៊ីន មានភក្ដីភាពចំពោះរាជានិយម នៅពេលលោកកាន់តំណែងជានាយករដ្ឋមន្ត្រី និងបានអនុវត្តការងារជាច្រើនដែលនាំមកនូវផលប្រយោជន៍ដល់ប្រទេសជាតិ និងប្រជានុរាស្ត្រ ។

លើសពីនេះ នៅពេលដែលលោក ថាក់ស៊ីន ត្រូវបានតុលាការចោទប្រកាន់ និងផ្ដន្ទាទោសដាក់ពន្ធនាគារហើយនោះ អតីតនាយករដ្ឋមន្ត្រីវ័យ ៧៤ រូបនេះមិនបានបដិសេធ ឬខ្លាចរអារក្នុងការទទួលស្គាល់ទោសកំហុសរបស់ខ្លួនឡើយ ។ ម្យ៉ាងទៀត លោក ថាក់ស៊ីន ​ក៏​មាន​វ័យ​ចំណាស់ទៅហើយ និងថែមទាំងមានជំងឺ​ដែល​តម្រូវ​ឲ្យមាន​ការ​ព្យាបាល និងថែទាំ​ពី​គ្រូពេទ្យ​ឯកទេសផងដែរ ។

ហេតុដូច្នេះហើយទើបព្រះមហាក្សត្រទ្រង់បានសម្រេចព្រះទ័យបន្ថូរបន្ថយទោសមកត្រឹម ១ ឆ្នាំសម្រាប់លោក ថាក់ស៊ីន ដោយទ្រង់សង្ឃឹមថា ទ្រង់នឹងប្រើប្រាស់ព្រះបញ្ញាញាន ក៏ដូចជាព្រះរាជកិច្ចរបស់ទ្រង់ ដើម្បីបន្តជួយប្រទេសជាតិ សង្គមជាតិ និងប្រជានុរាស្ត្រជាដើម ។

គួរបញ្ជាក់ថា លោក ថាក់ស៊ីន ត្រូវបានតុលាការកំពូលផ្ដន្ទាទោសដាក់ពន្ធនាគាររយៈពេល ៨ ឆ្នាំក្នុងសំណុំរឿងផ្លូវច្បាប់ចំនួន ៣ ករណី បន្ទាប់ពីចុះចតភ្លាមៗនៅទីតាំង VIP មួយកន្លែងក្នុងព្រលានយន្តហោះដនមឿងរបស់ទីក្រុងបាងកក ក្រោយសម្រេចវិលត្រលប់ចូលស្រុកវិញកាលពីថ្ងៃទី២២ ខែសីហា ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ តើអ្នកណាចុះហត្ថលេខាអមព្រះមហាក្សត្រ ថៃ លើក្រឹត្យបន្ថូរបន្ថយទោស​លោក ថាក់ស៊ីន?