លោក Biden ៖ គ្មាននរណាម្នាក់អាចហាមវិបត្តិអាកាសធាតុនោះទេ សូម្បី អាមេរិក ខ្លួនឯងក៏រងគ្រោះដូចគ្នា

ប្រធានាធិបតីអាមេរិកលោក Joe Biden បាននិយាយកាលពីពេលថ្មីៗនេះថា គ្មាននរណាម្នាក់អាចហាម ឬប្រឆាំងនឹងវិបត្តិអាកាសធាតុបាននោះទេ ខណៈប្រទេសជុំវិញពិភពលោកកំពុងប្រឈមមុខនឹងការដួលរលំពីគ្រោះមហន្តរាយកាន់តែខ្លាំងឡើងៗ ។

លោក Biden បានប្រាប់អ្នកយកព័ត៌មាននៅឯសេតវិមានថា “គ្មាននរណាម្នាក់អាចជំទាស់នឹងផលប៉ះពាល់នៃវិបត្តិអាកាសធាតុបាននោះទេ សូម្បីអាមេរិកខ្លួនឯងក៏រងគ្រោះដូចគ្នា ។ ជាក់ស្ដែងថ្មីៗនេះនៅឆ្នេរសមុទ្រភាគខាងលិចនៃរដ្ឋ Florida បានជួបប្រទះនឹងព្យុះសង្ឃរា Idalia ដែលមិនធ្លាប់មានពីមុនមកឡើយ” ។

ប្រធានាធិបតីរូបនេះបន្ថែមថា “ទឹកជំនន់ជាប្រវត្តិសាស្ត្រ គ្រោះរាំងស្ងួត ក៏ដូចជាកម្ដៅកាន់តែខ្លាំង និងភ្លើងឆេះព្រៃយ៉ាងសន្ធោរសន្ធៅ បានបណ្តាលឲ្យមានការខូចខាតយ៉ាងដំណំដែលយើងមិនធ្លាប់ឃើញពីមុនមក ហើយមិនត្រឹមតែនៅទូទាំងកោះហាវ៉ៃក្នុងសហរដ្ឋអាមេរិកប៉ុណ្ណោះទេ ប៉ុន្តែនៅក្នុងប្រទេសកាណាដា និងផ្នែកផ្សេងទៀតនៃពិភពលោក ក៏មាន​ភ្លើង​ឆេះ​ព្រៃយ៉ាង​សន្ធាប់ផងដែរ” ។

ទន្ទឹមនោះ លោក Biden ក៏បានបញ្ជាឲ្យទីភ្នាក់ងារគ្រប់គ្រងគ្រោះមហន្តរាយសហព័ន្ធ (FEMA) ដាក់ពង្រាយបុគ្គលិកសង្គ្រោះបន្ទាន់ចំនួន ១,៥០០ នាក់ និងទីភ្នាក់ងារឆ្មាំឆ្នេរសមុទ្រ ៩០០ នាក់ទៅភាគអាគ្នេយ៍ ក្រោយពេលដែលព្យុះសង្ឃរា Idalia បានបោកបក់មកលើដីគោករបស់សហរដ្ឋអាមេរិក ។

គ្រាន់តែក្នុងខែសីហា សហរដ្ឋអាមេរិកបានជួបប្រទះនូវគ្រោះមហន្តរាយធម្មជាតិជាច្រើនករណីដូចជា ភ្លើងឆេះព្រៃដែលបានបំផ្លិចបំផ្លាញកោះ Maui រដ្ឋហាវ៉ៃ ដោយសារតែលក្ខខណ្ឌអាកាសធាតុស្ងួតហួតហែង និងខ្យល់បក់ខ្លាំងមកពីព្យុះកំបុតត្បូង Dora ហើយថែមទាំងបានសម្លាប់មនុស្សជាង ១០០ នាក់ផងដែរ ។

បន្ទាប់មកទីក្រុងមួយចំនួនក្នុងរដ្ឋ Florida ត្រូវជន់លិច ​បន្ទាប់​ពី​រងការវាយប្រហារដោយព្យុះសង្ឃរា Idalia ហើយវាគឺជា​ព្យុះ​ដ៏​ខ្លាំង​បំផុត​ដែល​​បោកបក់​នៅ​តំបន់ Big Bend ក្នុង​រយៈពេល ១២៧ ឆ្នាំ និងបណ្ដាលឲ្យមនុស្ស ២ នាក់បាត់បង់ជីវិត ខណៈពលរដ្ឋជាង ២៦៥,០០០ នាក់មិនមានអគ្គិសនីប្រើប្រាស់ឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ព្យុះទីហ្វុង Haikui បង្ខំឲ្យតៃវ៉ាន់ លុបចោលជើងហោះហើរ និងជម្លៀសមនុស្សរាប់ពាន់នាក់