លោក ហ្សេលេនស្គី ប្រកាសបណ្តេញរដ្ឋមន្ត្រីការពាជាតិចេញពីតំណែង ក្រោយកើតរឿងពុករលួយ ក្នុងក្រសួង

កាលពីថ្ងៃអាទិត្យទី៣ខែកញ្ញា ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី បានប្រកាសអំពីផែនការបណ្តេញរដ្ឋមន្ត្រីការពារជាតិ លោក Aleksey Reznikov ចេញពីតំណែង។ លោក ហ្សេលេនស្គី និយាយក្នុងសុន្ទរកថាវីដេអូមួយថា ការសម្រេចចិត្តនេះនឹងត្រូវពិចារណាដោយសភានៅសប្តាហ៍ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ ប្រធានាធិបតីរូបនេះ លើកឡើងថា លោក Rustem Umerov ដែលបច្ចុប្បន្នជាប្រធាននៃមូលនិធិទ្រព្យសម្បត្តិរដ្ឋរបស់អ៊ុយក្រែន នឹងចូលមកជំនួសតំណែង។

ដោយពន្យល់ពីការសម្រេចចិត្តរបស់គាត់ លោក ហ្សេលេនស្គី និយាយថា ក្រសួងការពារជាតិ ត្រូវការវិធីសាស្រ្តថ្មី និងអន្តរកម្មទម្រង់ថ្មី ទាំងជាមួយយោធា និងសង្គមទាំងមូល។ សភាស្គាល់លោក Umerov ច្បាស់ណាស់ ដូច្នេះហើយមិនចាំបាច់ត្រូវណែនាំអ្វីច្រើនទេ។

លោក Umerov ដែលជាពាណិជ្ជករជនជាតិអ៊ុយក្រែន មានដើមកំណើត Crimea Tatar បានកាន់តួនាទីនៃមូលនិធិអចលនទ្រព្យរដ្ឋកាលពីរដូវស្លឹកឈើជ្រុះឆ្នាំមុន។ គាត់ធ្លាប់ធ្វើជាទីប្រឹក្សាអតីតប្រធានអង្គការប្រជាជន Crimea Tatar Mejlis គឺលោក Mustafa Dzhemilev។ អង្គការនេះ ត្រូវបានហាមប្រាមនៅក្នុងប្រទេសរុស្ស៊ីចាប់តាំងពីឆ្នាំ២០១៦មក ជុំវិញសកម្មភាពជ្រុលនិយម ក៏ដូចជាទំនាក់ទំនងជាមួយក្រុមជ្រុលនិយម និងភេរវករផ្សេងទៀត។

គួរបញ្ជាក់ថា លោក Reznikov ចូលកាន់តំណែងជារដ្ឋមន្ត្រីក្រសួងការពារជាតិ ក្នុងខែវិច្ឆិកាឆ្នាំ២០២១ ភ្លាមៗមុនពេលជម្លោះរវាងរុស្ស៊ី-អ៊ុយក្រែនផ្ទុះឡើង។

អំឡុងពេលនៃការកាន់តំណែងរបស់គាត់ គឺត្រូវបានញាំញីដោយរឿងអាស្រូវពុករលួយជាច្រើន ដែលភាគច្រើនពាក់ព័ន្ធនឹងការទិញឧបករណ៍ និងគ្រឿងឧបភោគបរិភោគសម្រាប់យោធារបស់ប្រទេស ក្នុងតម្លៃអតិផរណាមិនធម្មតា៕

ប្រែសម្រួល៖ Vann Vann

ប្រភព៖ RT

ចុចអាន៖ ក្រុមហ៊ុនផលិតសព្វាវុធអង់គ្លេស នឹងទៅបើករោងចក្រនៅ អ៊ុយក្រែន