ព្យុះទីហ្វុង Haikui បង្ខំឲ្យតៃវ៉ាន់ លុបចោលជើងហោះហើរ និងជម្លៀសមនុស្សរាប់ពាន់នាក់

តៃវ៉ាន់ បានលុបចោលជើងហោះហើរក្នុងស្រុក ហើយជម្លៀសមនុស្សជិត៤០០០នាក់ ខណៈព្យុះទីហ្វុង Haikui បោកបក់ចូលទៅក្នុងភាគអាគ្នេយ៍នៃកោះនេះកាលពីថ្ងៃអាទិត្យ ដោយនាំមកនូវភ្លៀងធ្លាក់និងខ្យល់បក់ខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះ Haikui បានវាយប្រហារនៅតំបន់ភ្នំ ភាគអាគ្នេយ៍កោះនេះ ក្នុងនាមជាព្យុះទីហ្វុងទីមួយ ដែលវាយប្រហារតៃវ៉ាន់ដោយផ្ទាល់ នារយៈពេល៤ឆ្នាំចុងក្រោយ។ បណ្តាស្រុក​និង​ក្រុងនានា​ក៏​បាន​លុប​ចោលម៉ោងសិក្សា និង​ប្រកាស​ថ្ងៃ​ឈប់​សម្រាក​សម្រាប់​កម្មករផងដែរ។

ស្របពេលជាមួយគ្នានោះ ប្រធានាធិបតីតៃវ៉ាន់ លោកស្រី Tsai Ing-wen បានប្រាប់កិច្ចប្រជុំមន្ត្រីគ្រប់គ្រងគ្រោះមហន្តរាយថា ប្រជាជន គួរតែចៀសវាងការចេញទៅក្រៅ, កុំឡើងភ្នំ, ទៅឆ្នេរសមុទ្រ, នេសាទ ឬចូលរួមលេងកីឡាក្នុងទឹកឲ្យសោះ ខណៈសេវាស្រឡាងដឹកអ្នកដំណើរ ទៅកាន់កោះជុំវិញក៏ត្រូវបានផ្អាកផងដែរ ។

ទោះយ៉ាងណា Haikui គឺជាព្យុះមានកម្លាំងខ្សោយជាងព្យុះទីហ្វុង Saola ដែលបានវាយប្រហារទីក្រុងហុងកុង និងខេត្តក្វាងទុងភាគខាងត្បូងប្រទេសចិន កាលពីថ្ងៃសៅរ៍។

ពាក់ព័ន្ធនឹងបញ្ហានេះដែរ យោធាក៏​បាន​ចល័ត​កម្លាំង និង​ឧបករណ៍ ​ដើម្បី​ជួយ​ក្នុង​កិច្ច​ប្រឹងប្រែង​សង្គ្រោះ​គ្រាមានទឹកជំនន់ និង​ការ​ជម្លៀស​ចេញផងដែរ ។

គួរបញ្ជាក់ថា បន្ទាប់ពីឆ្លងកាត់ភាគខាងត្បូងកោះតៃវ៉ាន់, ព្យុះទីហ្វុង Haikui ត្រូវបានគេព្យាករថា នឹងចូលទៅក្នុងច្រកសមុទ្រតៃវ៉ាន់ ហើយសំដៅទៅប្រទេសចិន៕

ប្រែសម្រួល៖ Vann Vann

ប្រភព៖ Reuters

ចុចអាន៖ ព្យុះទីហ្វុង សាវឡា ចូលដល់សមុទ្រវៀតណាម ជាមួយកម្លាំងខ្យល់ ២០១គីឡូម៉ែត្រក្នុងមួយម៉ោង