សារព័ត៌មាន DailyMail ៖ រុស្ស៊ី យកសម្បកកង់ឡានបាំងយន្តហោះទម្លាក់គ្រាប់បែកនុយក្លេអ៊ែរ ដើម្បីការពារពី ដ្រូនអ៊ុយក្រែន

ប្រទេសរុស្ស៊ី បានចាប់ផ្តើមយកសម្បកកង់ឡាន ទៅដាក់លើយន្តហោះទម្លាក់គ្រាប់បែកនុយក្លេអ៊ែរ Tu-95 របស់ខ្លួន ក្នុងការប៉ុនប៉ងដើម្បីការពារ ពីដ្រូនរបស់អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពផ្កាយរណប បានបង្ហាញពីយន្តហោះវាយប្រហាររហ័ស្សនាម “ខ្លាឃ្មុំ” នៅឯមូលដ្ឋានទ័ពអាកាស Engels-2 ក្នុងតំបន់ Saratov ដែលមានសម្បកកង់ជាច្រើន ដាក់នៅពីលើ។

មូលដ្ឋាននេះ ត្រូវបានវាយប្រហារដោយយន្តហោះគ្មានមនុស្សបើករបស់អ៊ុយក្រែន ក្នុងការវាយប្រហារចំនួនពីរលើក កាលពីខែធ្នូឆ្នាំមុន បន្ទាប់ពីនោះ លោក វ្ល៉ាឌីមៀរ ពូទីន ត្រូវបង្ខំចិត្តបន្លាស់ទីយន្តហោះ Tu-95 មួយចំនួន ទៅកាន់មូលដ្ឋានទ័ពអាកាសផ្សេងវិញ។

ថ្វីបើហេតុផលសម្រាប់ការយកសម្បកកង់ឡានទៅបាំងស្លាប និងផ្នែកនៃតួយន្តហោះខាងលើ មិនទាន់ត្រូវបានគេដឹងច្បាស់ទាំងស្រុងក៏ដោយ ប៉ុន្តែសេចក្តីរាយការណ៍ក្នុងគេហទំព័រ The Aviationist បានលើកឡើងថា សម្បកកង់ឡាន គឺត្រូវបានប្រើប្រាស់ដើម្បីការពារយន្តហោះទម្លាក់គ្រាប់បែកដ៏មានតម្លៃ ពីការវាយប្រហារដែលធ្វើឡើងដោយដ្រូន kamikaze។ កង់ឡាន​អាច​នឹង​ស្រូប​យក​ផល​ប៉ះ​ពាល់​ពីការវាយប្រហាររបស់ដ្រូន ឬ​ដើម្បី​ការពារ​ធុង​ប្រេង​នៅ​លើ​យន្តហោះ។

រឿងនេះ ​កើតឡើង​បន្ទាប់​ពីអ៊ុយក្រែន បើក​ការ​វាយប្រហារ​​ថ្មីៗ​ចំនួន​ពីរ​លើក លើ​យន្តហោះ​​រុស្ស៊ី។

ក្នុងការវាយប្រហារមួយនៅ Pskov, យន្តហោះដឹកជញ្ជូន Il-76 ចំនួន៤គ្រឿង ត្រូវខូចខាតដោយក្នុងនោះមាន២គ្រឿងប្រើការលែងបានជួសជុលមិនកើត បន្ទាប់ពីត្រូវភ្លើងឆាបឆេះ។

ដោយឡែក ក្នុងការវាយប្រហារមួយទៀតនៅទីក្រុង Kursk, អ៊ុយក្រែនបានអះអាង បំផ្លាញយន្តហោះចម្បាំង Su-30 ចំនួន៤គ្រឿង, យន្តហោះចម្បាំង MiG-29 មួយគ្រឿង, ប្រព័ន្ធការពារដែនអាកាស Pantsir-S1 ២គ្រឿង និងរ៉ាដាមួយ ដែលភ្ជាប់ទៅនឹងប្រព័ន្ធមីស៊ីលរយៈចម្ងាយឆ្ងាយបាញ់ពីដីទៅអាកាស S-300៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ដ្រូនអ៊ុយក្រែន ចូលកម្ទេច យន្តហោះទម្លាក់គ្រាប់បែកតម្លៃ២៧០លានដុល្លាររបស់រុស្ស៊ី ដល់ក្នុងបន្ទាយ