ជប៉ុន​ នឹង​បន្ថែមថវិកា ១៤១ លាន​ដុល្លារ​​ទៀត ដើម្បីជួយទីផ្សារគ្រឿងសមុទ្រ

នាយករដ្ឋមន្ត្រីជប៉ុន លោក Fumio Kishida បាននិយាយកាលពីថ្ងៃចន្ទ ទី៤ ខែកញ្ញាថា រដ្ឋាភិបាលជ៉ុននឹងបន្ថែមលុយជាង ១៤១.៤១ លានដុល្លារអាមេរិក ដើម្បីគាំទ្រដល់ឧស្សាហកម្មជលផល បន្ទាប់ពីចិនហាមមិនឲ្យនាំចូលគ្រឿងសមុទ្រ។

ការហាមប្រាមរបស់ចិនត្រូវបានធ្វើឡើង បន្ទាប់ពីប្រទេសជប៉ុនចាប់ផ្តើមបញ្ចេញទឹកវិទ្យុសកម្មដែលត្រូវបានសម្អាតពីរោងចក្រថាមពលនុយក្លេអ៊ែរ Fukushima Daiichi ដែលបានបំផ្លាញកាលពីខែមុន ។

ចំពោះការបន្ថែមលុយនេះដែរ នឹងធ្វើឲ្យថវិកាមូលនិធិរដ្ឋាភិបាលជប៉ុនកើនដល់ ៦៨៩ លានដុល្លារលើគម្រោងថវិកាចាស់ដែលមាន ៥៤៨ លានដុល្លារ ដើម្បីជួយអភិវឌ្ឍទីផ្សារថ្មី និងរក្សាត្រីបង្កកដែលនៅសេសសល់ រហូតដល់អាជីវករអាចលក់បាន នៅពេលដែលតម្រូវការកើនឡើង ។

គួរបញ្ជាក់ថា កាលពីឆ្នាំ ២០២២ ប្រទេសជប៉ុនកើបលុយបានពីការនាំចេញផលិតផលសមុទ្ររហូតទៅដល់ ២.៦ ពាន់លានដុល្លារ ខណៈទីផ្សារគ្រាក់ៗរបស់ជប៉ុន រួមមាន ចិន ហុងកុង និងថៃជាដើម ៕

ប្រែសម្រួល៖ នាង រតនៈ

ប្រភព៖ CNA

ចុចអាន៖ ជប៉ុន ដាក់ចេញវិធានការ ២ ដើម្បីជួយទីផ្សារគ្រឿងសមុទ្រ ក្រោយការបង្ហូរ​ទឹកសំណល់ចេញពីរោងចក្រនុយក្លេអ៊ែរ