ថៃ ត្រៀមនឹងបើកឲ្យទេសចរ ចិន ចូលមកប្រទេសដោយមិនចាំបាច់មាន​ទិដ្ឋាការ

សមាគមភ្នាក់ងារទេសចរណ៍​ថៃ (ATTA) បង្ហាញក្ដីសាទរ​ចំពោះគោលនយោបាយរបស់នាយករដ្ឋមន្ត្រីថ្មីលោក សេតថា ថាវីស៊ីន ពាក់ព័ន្ធទៅនឹង​ច្បាប់លែងយកទិដ្ឋាការសម្រាប់ទេសចរ​ចិន ដែលចូលជាធរមានចាប់ពីថ្ងៃទី១​ ខែតុលា ឆ្នាំ ២០២៣ តទៅ ។

គោលនយោបាយនេះត្រូវបានដាក់ចេញឡើងដើម្បីជំរុញទំនុកចិត្ត​ភ្ញៀវចិនឡើងវិញ​ បន្ទាប់ពីមានបណ្តាញសង្គមចុះផ្សាយពីបញ្ហាអសកម្មពាក់ព័ន្ធនឹងការចាប់ជម្រិតវះយកគ្រលៀនជាដើម ប៉ុន្តែភាពជោគជ័យរបស់គោលនយោបាយនេះ ក៏នឹងពឹងផ្អែកលើការកសាងទំនុកចិត្តក្នុងចំណោមភ្ញៀវទេសចរចិនថាតើការធ្វើដំណើរក្នុងប្រទេសថៃមានសុវត្ថិភាពពិតប្រាកដឬអត់ ។

ទោះជាយ៉ាងនេះក្តី ក្រុមហ៊ុនទេសចរណ៍ក៏កំពុងរងចាំយ៉ាងអន្ទះសារផងដែរ សម្រាប់ការប្រកាសជាផ្លូវការពីរដ្ឋាភិបាលថៃទាក់ទងនឹងការលើកលែងមួយនេះ ។

ជាក់ស្តែង រដ្ឋាភិបាលចិនមិនទាន់ផ្សព្វផ្សាយព័ត៌មាននេះជាសាធារណៈនៅឡើយទេ ដូច្នេះការកសាងទំនុកចិត្តគឺជារឿងសំខាន់ ។ លើសពីនេះ ការឲ្យលោក សេតថា ជាអ្នកផ្សព្វផ្សាយទេសចរណ៍ថៃ រួមជាមួយការធានាចំពោះភ្ញៀវទេសចរណ៍ថាប្រទេសថៃជាគោលដៅសុវត្ថិភាព គឺជាសកម្មភាពដ៏សមស្របបំផុត ។

ពាក់ព័ន្ធទៅនឹងគោលនយោបាយលើកលែងទិដ្ឋាការនេះដែរត្រូវបានគេរំពឹងថា នឹងជំរុញឲ្យជនជាតិចិនដែលធ្វើការនៅក្នុងប្រទេសផ្សេងទៀត ជាពិសេសប្លុកអាស៊ាន និងអាស៊ីបូព៌ា ធ្វើដំណើរទៅកាន់ប្រទេសថៃកាន់តែច្រើន ៕​

ប្រែសម្រួល៖ នាង រតនៈ

ប្រភព៖​ The Nation Thailand