មេដឹកនាំអាស៊ីអាគ្នេយ៍ យល់ព្រមបង្កើតយន្តការត្រយកា (Troika) ដើម្បីដោះស្រាយវិបត្តិ មីយ៉ាន់ម៉ា

មេដឹកនាំអាស៊ីអាគ្នេយ៍ បានយល់ព្រមបង្កើត យន្តការត្រយកា (Troika) ដែលរួមមានអតីតប្រធានអាស៊ាន ប្រធានបច្ចុប្បន្ន និងប្រធាននាពេលខាងមុខ ដើម្បីដោះស្រាយវិបត្តិនៅក្នុងប្រទេសមីយ៉ាន់ម៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកសារព័ត៌មានកាលពីថ្ងៃអង្គារ ទី៥ ខែកញ្ញា រដ្ឋមន្ត្រីការបរទេសឥណ្ឌូណេស៊ីលោកស្រី Retno Marsudi និយាយថា បណ្តាមេដឹកនាំ បានរំលឹកឡើងវិញពីតម្រូវការដើម្បីបញ្ឈប់អំពើហិង្សាក្នុងប្រទេសមីយ៉ាន់ម៉ា ហើយយល់ព្រមបង្កើតយន្តការត្រយកា ដែលនឹងអនុញ្ញាតឲ្យអតីតប្រធានអាស៊ាន ប្រធានបច្ចុប្បន្ន និងប្រធាននាពេលអនាគត រួមគ្នាដោះស្រាយវិបត្តិនិងរិះរកវិធីជាបន្តបន្ទាប់។

លោកស្រីបន្តថា “ព្រោះ​អ្នក​រាល់​គ្នា​យល់ហើយ​ ​ស្ថានភាព​មិន​អាច​ផ្លាស់​ប្តូរ​ក្នុង​រយៈពេលត្រឹមតែមួយ​ឆ្នាំ​ទេ ហើយដោយសារតែការប្តេជ្ញាចិត្តរបស់អាស៊ានក្នុងការជួយប្រជាជនមីយ៉ាន់ម៉ា, ការអនុវត្តយន្តការត្រយកា រវាងប្រធានអាស៊ានទាំង៣ពេលនេះ គឺជារឿងចាំបាច់ណាស់”។

លោកស្រី Marsudi បន្ថែមថា មេដឹកនាំអាស៊ាន ក៏បានពិនិត្យឡើងវិញ លើការអនុវត្តកិច្ចព្រមព្រៀងឯកច្ឆ័ន្ទ ៥ ចំណុច ដែលចេញដាក់តាំងតែពីខែមេសា ឆ្នាំ២០២១ មកម្ល៉េះផងដែរ ហើយសម្រេចចិត្តថា វាគួរតែនៅជាឯកសារយោងដ៏សំខាន់ ដើម្បីដោះស្រាយវិបត្តិនយោបាយដែលកំពុងបន្តនៅក្នុងប្រទេសមីយ៉ាន់ម៉ាដែរឬក៏អត់ ។

គួរបញ្ជាក់ថា មនុស្សរាប់ពាន់នាក់បានស្លាប់ និងជម្លៀសខ្លួនចេញពីខាងក្នុងប្រទេសមីយ៉ាន់ម៉ា ចាប់តាំងពីយោធា ដណ្តើមយកអំណាចក្នុងរដ្ឋប្រហារប្រឆាំងរដ្ឋាភិបាលជាប់ឆ្នោត របស់លោកស្រី អ៊ុងសាន ស៊ូជី នៅខែកុម្ភៈ ឆ្នាំ២០២១ ៕

ប្រែសម្រួល៖ Vann Vann

ប្រភព៖ CNA

ចុចអាន៖ ហ្វីលីពីន ប្រកាសត្រៀមខ្លួនធ្វើជាប្រធានអាស៊ានឆ្នាំ២០២៦ ជំនួស មីយ៉ាន់ម៉ា