ជប៉ុន បង្ហាញផែនការបណ្ដុះបណ្ដាលផ្នែកឌីជីថលដល់ពលរដ្ឋនៅអាស៊ាន ៥ ពាន់នាក់

នាយករដ្ឋមន្ត្រីជប៉ុនលោក Fumio Kishida បានបង្ហាញពីផែនការរបស់ប្រទេសជប៉ុនក្នុងការជំរុញកិច្ចសហប្រតិបត្តិការឌីជីថលជាមួយប្រជាជាតិអាស៊ីអាគ្នេយ៍ (អាស៊ាន) និងបណ្តុះបណ្តាលមនុស្សយ៉ាងហោចណាស់ ៥,០០០ នាក់ក្នុងរយៈពេល ៣ ឆ្នាំខាងមុខ ។

លោក Kishida បានប្រាប់វេទិកា អាស៊ាន-ឥណ្ឌូប៉ាស៊ីហ្វិកថា “ទីក្រុងតូក្យូក៏នឹងគាំទ្រកិច្ចខិតខំប្រឹងប្រែងរបស់សមាជិកអាស៊ាននីមួយៗក្នុងការធ្វើហេដ្ឋារចនាសម្ព័ន្ធឌីជីថល ពង្រឹងសន្តិសុខតាមអ៊ីនធឺណិត ក៏ដូចជាពង្រឹងខ្សែសង្វាក់ផ្គត់ផ្គង់អាហារ និងផលិតផលផ្សេងៗទៀតផងដែរ” ។

លោក Kishida បានបន្ថែមថា “ប្រទេសរបស់យើងនឹងរីកចម្រើនជាមួយសមាជិកអាស៊ានដោយការលើកកម្ពស់កិច្ចសហប្រតិបត្តិការបច្ចេកទេសជាមួយពួកគេ ហើយរដ្ឋាភិបាលទីក្រុងតូក្យូក៏បានបង្ហាញពីគំនិតផ្តួចផ្តើមនៃការតភ្ជាប់ទ្រង់ទ្រាយធំរវាងជប៉ុន និងអាស៊ាន ជាពិសេសជប៉ុននឹងពង្រឹងសុវត្ថិភាពដែនសមុទ្រជាមួយអាស៊ាននៅក្នុងគំនិតផ្តួចផ្តើមថ្មីរបស់ខ្លួន ។

បច្ចុប្បន្ននាយករដ្ឋមន្ត្រីជប៉ុនលោក Fumio Kishida កំពុងស្ថិតនៅក្នុងប្រទេសឥណ្ឌូណេស៊ី ដើម្បីជួបពិភាក្សាជាមួយមេដឹកនាំអាស៊ាន ក៏ដូចជាប្រទេសចិន និងកូរ៉េខាងត្បូងផងដែរ ខណៈឆ្នាំនេះក៏ជាខួបលើកទី ៥០ នៃទំនាក់ទំនងមិត្តភាព និងកិច្ចសហប្រតិបត្តិការរវាងជប៉ុន និងអាស៊ាន ។

គួរបញ្ជាក់ថា ប្រទេសឥណ្ឌូណេស៊ីកំពុងរៀបចំកិច្ចប្រជុំកំពូលអាស៊ានលើកទី ៤៣ និងកិច្ចប្រជុំកំពូលពាក់ព័ន្ធដែលបានចាប់ផ្ដើមតាំងតែពីថ្ងៃទី៥ មកម្ល៉េះ ហើយនឹងបន្តដល់ថ្ងៃទី៧ ខែកញ្ញា ខណៈប្រធានាធិបតីសហរដ្ឋអាមេរិកលោក Joe Biden នឹងមិនមានវត្តមានចូលរួមឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Kyodo

ចុចអាន ៖ តើមេដឹកនាំប្រទេស អាស៊ាន រូបណាខ្លះនាំយកភរិយាចូលរួមក្នុងកិច្ចប្រជុំ កំពូលនៅ ឥណ្ឌូណេស៊ី?