ស្ត្រីម្នាក់សម្រាលកូនលើរថភ្លើងនៅប្រទេស វៀតណាម

ស្ត្រីម្នាក់បានសម្រាលកូនស្រីដោយសុវត្ថិភាព លើខ្សែរថភ្លើងដែលធ្វើដំណើរពីទីក្រុងហូជីមិញ ទៅកាន់ទីក្រុងដាណាំង នៅថ្ងៃពុធ ទី៦ ខែសីហា ។

ការសម្រាលប្រព្រឹត្តទៅដោយរលូន អរគុណដល់បុគ្គលិករថភ្លើង និងគ្រូពេទ្យម្នាក់ដែលចៃដន្យជាអ្នកដំណើរនៅទីនោះស្រាប់ ។

លោក Doan Kim Tuan ប្រធានក្រុមដឹកជញ្ជូនអ្នកដំណើរនៅស្ថានីយរថភ្លើង Da Nang បាននិយាយថា Cao Thi My D. អ្នកដំណើរនៅលើរថភ្លើង SE22 ដែលចេញដំណើរពីទីក្រុងហូជីមិញ កាលពីល្ងាចថ្ងៃអង្គារ បានសម្រាលកូន ខណៈរថភ្លើងកំពុងឆ្លងកាត់កណ្តាលខេត្ត Quang Nam ។

ភ្លាមៗនោះ អ្នកបម្រើការលើរថភ្លើងបានជូនដំណឹងដល់អ្នកបើកបរអំពីស្ថានភាពនេះ ដើម្បីប្រកាសសួររកពេទ្យនៅលើរថភ្លើង ។ ពេលរថភ្លើងមកដល់ស្ថានីយភ្លាម បុគ្គលិកនៅលើរថភ្លើង និងនៅស្ថានីយបានប្រញាប់ប្រញាល់បញ្ជូនម្ដាយ និងកូនទៅកាន់មន្ទីរពេទ្យ ។

មែនទែនទៅ អ្នកដំណើរជាច្រើនធ្លាប់សម្រាលកូននៅលើរថភ្លើងក្នុងប្រទេស វៀតណាម ហើយបុគ្គលិករថភ្លើងក៏បានទទួលការបណ្តុះបណ្តាលទាក់ទងនឹងស្ថានភាពបែបនេះដែរ ៕

ប្រែសម្រួល៖ វារី

ប្រភព៖ tuoitrenews

ចុចអាន៖ ស្រ្តី ២នាក់ នៅភូមិកោះប៉ោ សម្រាលកូនលើអូប័រ និងទូក ទទួលបានការយកចិត្តទុកដាក់