ប្រមុខ UN ឲ្យយោធា មីយ៉ាន់ម៉ា ស្ដាប់តាមប្រជាជនខ្លួនឯងផង

ប្រមុខអង្គការសហប្រជាជាតិ (UN) កាលពីថ្ងៃព្រហស្បតិ៍បានសម្តែងការព្រួយបារម្ភចំពោះស្ថានភាពនៅក្នុងប្រទេសមីយ៉ាន់ម៉ាដោយជំរុញឲ្យអាជ្ញាធរយោធាស្តាប់តាមប្រជាជនរបស់ខ្លួនឯង ដោះលែងអ្នកទោសនយោបាយ និងត្រលប់ទៅរកលទ្ធិប្រជាធិបតេយ្យវិញ ។

អគ្គលេខាធិការ UN លោក Antonio Guterres បានថ្លែងក្នុងសន្និសីទសារព័ត៌មានមួយនៅខាងក្រៅ​ពី​កិច្ច​ប្រជុំ​កំពូល​អាស៊ាន​នៅប្រទេស​ឥណ្ឌូណេស៊ីថា “ខ្ញុំនៅតែមានការព្រួយបារម្ភយ៉ាងខ្លាំងអំពីស្ថានភាពនយោបាយ មនុស្សធម៌ និងសិទ្ធិមនុស្សកាន់តែអាក្រក់ទៅៗនៅក្នុងប្រទេសមីយ៉ាន់ម៉ា រួមទាំងរដ្ឋរ៉ាក់ឃីន និងស្ថានភាពនៃជនភៀសខ្លួនដ៏ច្រើនដែលកំពុងរស់នៅក្នុងស្ថានភាពអស់សង្ឃឹមផងដែរ” ។

យោងតាមសេចក្តីថ្លែងការណ៍នៅលើគេហទំព័រផ្លូវការរបស់អង្គការសហប្រជាជាតិបានឲ្យដឹងថា ខណៈពេលដែលមានការកោតសរសើរចំពោះកិច្ចខិតខំប្រឹងប្រែងរបស់ឥណ្ឌូណេស៊ីក្នុងនាមជាប្រធានអាស៊ាន ក៏ដូចជាកិច្ចព្រមព្រៀង ៥ ចំណុចរបស់អាស៊ាន លោកក៏បានជំរុញឲ្យប្រទេសទាំងអស់បន្តស្វែងរកយុទ្ធសាស្រ្តបង្រួបបង្រួមមួយឆ្ពោះទៅកាន់ប្រទេសមីយ៉ាន់ម៉ាផងដែរ ។

គួរបញ្ជាក់ថា ប្រទេសមីយ៉ាន់ម៉ាផ្ទុះភាពចលាចល ចាប់តាំងពីដើមឆ្នាំ ២០២១ មកម្ល៉េះ នៅពេលដែលយោធាបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី និងបង្ក្រាបក្រុមអ្នកប្រឆាំងនឹងយោធា ដោយមានទាំងការចាប់ខ្លួនដាក់ពន្ធនាគារ និងឈានដល់ការសម្លាប់មនុស្សរាប់ពាន់នាក់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មីយ៉ាន់ម៉ា កាត់ទោសអ្នកកាសែតម្នាក់ ដាក់ពន្ធនាគារ ២០ឆ្នាំ