ហុងកុង រងការវាយប្រហារ ដោយភ្លៀងធ្លាក់ខ្លាំងមិនធ្លាប់មាន ក្នុងរយៈពេល ១៤០ឆ្នាំ

ហុងកុង និងទីក្រុងភាគខាងត្បូងប្រទេសចិនផ្សេងទៀត កំពុងប្រឈមមុខនឹងគ្រោះទឹកជំនន់ធ្ងន់ធ្ងរ ខណៈតំបន់នេះ កំពុងស៊ូទ្រាំនឹងភ្លៀងធ្លាក់ខ្លាំងបំផុតក្នុងកំណត់ត្រា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅ​ថ្ងៃ​សុក្រទី៨ខែកញ្ញា ផ្លូវនិង​ស្ថានីយ៍​រថភ្លើង​ក្រោម​ដីក្នុង​ទីក្រុង​ហុងកុង ត្រូវទឹកជន់លិចខណៈ​ដែល​មន្ត្រី ​បាន​បិទ​សាលារៀន និង​កន្លែង​ធ្វើ​ការ។

យោងតាមការិយាល័យអាកាសធាតុ ភ្លៀងធ្លាក់ដែលបានចាប់ផ្តើមកាលពីថ្ងៃព្រហស្បតិ៍ គឺមានកម្រិតធ្ងន់ធ្ងរ មិនធ្លាប់វាយប្រហារទីក្រុងនេះសោះក្នុងរយៈពេល១៤០ឆ្នាំ។

កាល​ពី​ថ្ងៃ​សុក្រ អាជ្ញាធរ​ហុងកុង​​និយាយ​ថា មនុស្សយ៉ាងតិច៨៣នាក់ ​ត្រូវ​បាន​បញ្ជូន​ទៅ​​មន្ទីរពេទ្យ​ក្នុង​រយៈពេល២៤ម៉ោង​ចុងក្រោយ ដោយសារ​អាកាសធាតុ​អាក្រក់។ ភ្លៀង​ក៏​បាន​បណ្តាល​ឲ្យ​មានបំណាក់​ដីផង​ដែរ ជាហេតុបង្កការកក​ស្ទះ​ផ្លូវ​មួយ​ចំនួន។

ក្រុមសង្កេតការណ៍ហុងកុងរាយការណ៍ថា ភ្លៀងធ្លាក់មានកម្រិត ១៥៨.១ មិល្លីម៉ែត្រ ដែលជាកម្រិតខ្ពស់បំផុត​ គិតចាប់តាំងពីកំណត់ត្រាចាប់ផ្តើមនៅក្នុងឆ្នាំ១៨៨៤មក។

ស្របពេលជាមួយគ្នានោះ ជើងហោះហើររាប់រយត្រូវបានផ្អាកនៅខេត្តក្វាងទុង ខណៈអាជ្ញាធរក្នុងតំបន់បានព្រមានអំពីទឹកជំនន់ភ្លាមៗ និងបញ្ជាឲ្យមនុស្សរស់នៅតំបន់ទំនាប ត្រូវជម្លៀសចេញ៕

ប្រែសម្រួល៖ Vann Vann

ប្រភព៖ BBC

ចុចអាន៖ មនុស្ស៣៣នាក់ស្លាប់ ដោយសារភ្លៀងធ្លាក់ខ្លាំងមិនធ្លាប់មាន នៅប៉េកាំង