អ្នកនេសាទនិងប្រជាជនជប៉ុន ដាក់ពាក្យបណ្តឹងទាមទារឲ្យបញ្ឈប់ការបញ្ចេញទឹកសំណល់ Fukushima

កាលពីថ្ងៃសុក្រទី៨ខែកញ្ញា អ្នកនេសាទ ព្រមទាំងប្រជាពលរដ្ឋ Fukushima និងខេត្តចំនួនប្រាំផ្សេងទៀតនៅតាមបណ្តោយឆ្នេរសមុទ្រភាគឦសានប្រទេសជប៉ុន បានដាក់ពាក្យប្តឹង ទាមទារឲ្យបញ្ឈប់ការបញ្ចេញទឹកសំណល់មានជាតិវិទ្យុសកម្ម ពីរោងចក្រនុយក្លេអ៊ែរ ចូលទៅក្នុងសមុទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេធាវីរបស់ពួកគេនិយាយថា នៅក្នុងពាក្យបណ្ដឹងដែលប្តឹងទៅតុលាការស្រុក Fukushima, ដើមបណ្តឹងចំនួន១៥១នាក់ ពោលគឺពីរភាគបីមកពី Fukushima បាននិយាយថា ការបង្ហូរទឹកនេះ ធ្វើឲ្យខូចដល់ជីវភាពរស់នៅរបស់សហគមន៍នេសាទ និងរំលោភលើសិទ្ធិរស់នៅដោយសន្តិភាពរបស់អ្នកស្រុក។

ការបញ្ចេញទឹកសំណល់បន្សុទ្ធរួចចូលទៅក្នុងមហាសមុទ្រ ដែលចាប់ផ្តើមកាលពីថ្ងៃទី២៤ខែសីហា និងត្រូវបានគេរំពឹងថានឹងអូសបន្លាយពេលច្រើនទសវត្សរ៍ គឺត្រូវបានប្រឆាំងយ៉ាងខ្លាំងដោយក្រុមជលផលដែលបារម្ភថា វានឹងប៉ះពាល់ដល់រូបភាពនៃការនេសាទរបស់ពួកគេ បើទោះបីជាមានការធានាអះអាងអំពីសុវត្ថិភាពក៏ដោយ។

ជើងក្រានរ៉េអាក់ទ័រចំនួនបី នៅរោងចក្រនុយក្លេអ៊ែរ Fukushima Daiichi បានរលាយ បន្ទាប់ពីគ្រោះរញ្ជួយដីកម្រិត៩.០រ៉ិចទ័រ និងរលកយក្សស៊ូណាមិក្នុងឆ្នាំ២០១១ បានបំផ្លាញប្រព័ន្ធត្រជាក់របស់វា។ រោងចក្រនេះបន្តផលិតទឹកដែលមានជាតិវិទ្យុសកម្មខ្ពស់ ដែលត្រូវបានបន្សុទ្ធ និងរក្សាទុកក្នុងធុងប្រហែល១០០០ ដែលគ្របដណ្តប់ភាគច្រើននៃបរិវេណរោងចក្រ។

រដ្ឋាភិបាលនិងប្រតិបត្តិកររោងចក្រគឺក្រុមហ៊ុន Tokyo Electric Power Company Holdings និយាយថា ធុងទាំងនោះចាំបាច់ត្រូវយកចេញ ដើម្បីអនុញ្ញាតឲ្យរោងចក្រនេះរុះរើចោល។

ប្រទេសចិន បានហាមឃាត់ការនាំចូលអាហារសមុទ្រជប៉ុនទាំងអស់ ដើម្បីឆ្លើយតបទៅនឹងការបញ្ចេញទឹកសំណល់ ខណៈហុងកុងនិងម៉ាកាវ បានផ្អាកការនាំចូលពីខេត្តចំនួន១០ រួមទាំង Fukushima ផងដែរ។

ចិន គឺជាប្រទេសនាំចូលគ្រឿងសមុទ្រធំបំផុតរបស់ជប៉ុន ហើយបម្រាមរបស់ខ្លួន បានប៉ះពាល់ដល់ឧស្សាហកម្មនេះយ៉ាងខ្លាំង៕

ប្រែសម្រួល៖ Vann Vann

ប្រភព៖ CNA

ចុចអាន៖ តម្លៃត្រីធូណាក្នុងមួយគីឡូក្រាមនៅ ជប៉ុន ក្រោយការបង្ហូរទឹក​សំណល់ចេញពីរោងចក្រនុយក្លេអ៊ែរ Fukushima