ព័ត៌មានអន្ដរជាតិ

រូបសំណាកធ្វើពីមាស ដែលរងការរិះគន់នៅ កូរ៉េខាងត្បូង ពេលនេះមានតម្លៃមហាសាល

បានផុស

១ year មុន

នៅ

ថ្ងៃចន្ទ ១១ កញ្ញា ២០២៣

ដោយ

រូបសំណាកធ្វើពីមាសកាលពីជិត ២០ ឆ្នាំមុន ដែលត្រូវបានគេរិះគន់ថាខ្ជះខ្ជាយថវិកាជាតិ ពេលនេះស្រាប់តែមានតម្លៃកើនឡើងខ្ពស់សឹងមិនជឿ ដោយសារតែតម្លៃមាសកើនឡើងនាបច្ចុប្បន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន JoongAng News បានបញ្ចាក់ឲ្យដឹងថាក្នុងឆ្នាំ ១៩៩៩ នៅក្នុងអណ្តូងរ៉ែមាសដែលគេបោះបង់ចោលមួយក្នុងស្រុក Hampyeong ខេត្ត South Jeolla ប្រទេសកូរ៉េខាងត្បូង មានសត្វប្រចៀវដែលមានរោមពណ៌លឿងដ៏កម្របានបង្ហាញខ្លួន។ ប្រភេទសត្វប្រចៀវនេះ ត្រូវបានអ្នកជំនាញចាត់ទុកថាបានផុតពូជទាំងស្រុងនៅលើឧបទ្វីបកូរ៉េ។

ដោយដឹងថា អណ្តូងរ៉ែមាសនេះអាចត្រូវបានកេងប្រវ័ញ្ចឬការចង់បានពីឈ្នួញចូលមក ទើបរដ្ឋាភិបាលស្រុក Hampyeong បានសម្រេចចិត្តសាងសង់រូបសំណាកសត្វប្រចៀវមាស ដោយមានគោលដៅទាក់ទាញភ្ញៀវទេសចរទៅកាន់ទឹកដីនៃគីមឈី។

នៅឆ្នាំ ២០០៥ បន្ទាប់ពីកិច្ចប្រជុំ និងការពិភាក្សាជាច្រើន មន្ត្រីនៃស្រុក Hampyeong បានសម្រេចចំណាយប្រាក់ ២.១លានដុល្លារ ដើម្បីទិញមាស ១៦២គីឡូក្រាម និងប្រាក់ ២៨១ គីឡូក្រាម ដើម្បីសាងសង់រូបសំណាកកម្ពស់ ២.១៣ម៉ែត្រ។

អ្នកដែលនៅពីក្រោយការងារនេះគឺជាងចម្លាក់ជនជាតិកូរ៉េដ៏ល្បីល្បាញ Byun Kun-ho ដែលបានចំណាយពេលប្រហែល៣ ឆ្នាំ ដើម្បីឆ្លាក់សត្វប្រចៀវមាសចំនួន ៥ ដែលកំពុងហោះហើរកាត់រង្វង់ប្រាក់ដ៏ធំមួយ។

យោងតាមអ្នកស្រុកក្នុងតំបន់ បានបញ្ជាក់ថា “រូបសំណាកដែលបានបញ្ចប់ត្រូវបានដាក់នៅក្នុងបន្ទប់តាំងពិពណ៌។ វាត្រូវបានសាងសង់ឡើងយ៉ាងពិសេសដើម្បីឲ្យស្រដៀងនឹងរូងភ្នំ ដែលជាជម្រកធម្មជាតិរបស់សត្វប្រចៀវ”។ នៅជាប់នឹងរូបសំណាកក៏បានដាក់ស៊ុតមាសទំហំប៉ុនតុកាហ្វេ ដើម្បីគោរពដល់វីរបុរសទេវកថារបស់ប្រទេសកូរ៉េ ដែលកើតចេញពីស៊ុត។

នៅពេលនោះ រដ្ឋាភិបាលក្នុងតំបន់ក៏មានជំនឿថា រូបសំណាកនេះនឹងនាំមកនូវភាពរុងរឿង និងទ្រព្យសម្បត្តិនៃអច្ឆរិយវត្ថុអេកូឡូស៊ីដល់តំបន់នេះ និងទាក់ទាញភ្ញៀវទេសចររាប់មិនអស់មកកាន់តំបន់នេះ។

យ៉ាងណាមិញ មិនយូរប៉ុន្មានរូបសំណាកនេះបានជួបប្រទះនឹងការរិះគន់ជាច្រើន។ មនុស្សជាច្រើនជឿថាការចំណាយរាប់លានដុល្លារលើរូបសំណាកមាសគឺជាការខ្ជះខ្ជាយ។ កាសែតក្នុងស្រុកមួយបានហៅការផ្លាស់ប្តូរនេះថាជាការសម្រេចចិត្តដែលមិនប្រុងប្រយ័ត្ននិងសែនខ្ជះខ្ចាយបំផុត។

ទោះជាយ៉ាងណាក៏ដោយ សំណាងដែលមិននឹកស្មានដល់បានមកដល់ស្រុក Hampyeong នៅពេលដែលតម្លៃលោហៈដ៏មានតម្លៃ និងតម្លៃមាស និងប្រាក់បានកើនឡើងយ៉ាងលឿនដល់កម្រិតកំណត់ត្រា។ ជាពិសេស អ្នកជំនាញប៉ាន់ប្រមាណថា បន្ទាប់ពីអស្ថិរភាពសេដ្ឋកិច្ចនៃជំងឺរាតត្បាតកូវីដ១៩តម្លៃមាសបានឈានដល់កម្រិតមួយ ហើយអាចឡើងដល់ ១១ លានដុល្លារអាមេរិក។

ប៉ុន្តែនោះមិនមែនជាអ្វីដែលគួរនិយាយនោះទេ ទីតាំងដាច់ស្រយាលនៃរូបសំណាកនេះបានធ្វើឲ្យអ្នកទេសចរទាំងអស់សម្រុកមកទស្សនាច្រើនកុះករ។ អ្នកទេសចរកូរ៉េប្រហែល១៥,០០០នាក់ភាគច្រើន បានទៅទស្សនារូបសំណាកនេះក្នុងរយៈពេលប៉ុន្មានសប្តាហ៍កន្លងមកនេះ។

នាពេលខាងមុខ មន្ត្រីមូលដ្ឋានគ្រោងនឹងរើរូបសំណាកនេះ ទៅកាន់កន្លែងតាំងពិព័រណ៍ក្នុងស្រុក ដើម្បីឲ្យសាធារណជនអាចចូលប្រើប្រាស់បានកាន់តែច្រើន។ ថ្វីត្បិតតែតម្លៃរូបសំណាកអាចឡើងខ្ពស់គ្រប់ពេលក៏ដោយ ក៏អ្នកស្រុកមិនមានគម្រោងលក់វានៅលើទីផ្សារនោះទេ។

អ្នកតំណាងស្រុក Hampyeong បានបង្ហើបថា «យើងវិនិយោគលើការសាងសង់ក្នុងគោលបំណងនាំមកនូវតម្លៃវប្បធម៌ មិនរកប្រាក់ចំណេញ»៕

ប្រែសម្រួល៖ សាង ស្រីល័ក្ខ

ចុចអាន៖៥ ប្រទេសក្នុងអាស៊ាន ទទួលបានប្រាក់ឈ្នួលខ្ពស់បំផុត