តើ ពូទីន នឹងឲ្យ កូរ៉េខាងជើង ដឹកអ្វីទៅប្រទេសវិញ ហើយ រុស្ស៊ី ទទួលបានអ្វី​ពី គីម ជុងអ៊ុន?

ការធ្វើដំណើរផ្លូវឆ្ងាយរបស់មេដឹកនាំកូរ៉េខាងជើងលោក គីម ជុងអ៊ុន តាមរយៈរថភ្លើងពាសដែកទៅកាន់ប្រទេសរុស្ស៊ីដើម្បីជួបពិភាក្សាជាមួយលោកប្រធានាធិបតី វ្ល៉ាឌីមៀរ ពូទីន ត្រូវបានគេមើលឃើញថា ប្រទេសទាំងពីរសុទ្ធតែទទួលបានផលប្រយោជន៍រៀងៗខ្លួន ។

លោក គីម ដែលបានចាកចេញពីទីក្រុងព្យុងយ៉ាងកាលពីថ្ងៃអាទិត្យ និងទៅដល់ស្ថានីយ៍រថភ្លើង Khasan ក្នុង​តំបន់ Primorye ចុង​បូព៌ា​​រុស្ស៊ីកាលពីថ្ងៃអង្គារ អាចនឹងអញ្ជើញជួបពិភាក្សាជាមួយលោក ពូទីន ស្ដីអំពីកិច្ចព្រមព្រៀមលក់សព្វាវុធដើម្បីជួយដល់សង្គ្រាមរបស់រុស្ស៊ីនៅលើទឹកដីអ៊ុយក្រែន ។

ទន្ទឹមនោះ អ្នកជំនាញមើលឃើញថា ក្រោយជំនួបកំពូលរវាងលោក គីម និងលោក ពូទីន រួចហើយនោះ កូរ៉េខាងជើងនឹងផ្ដល់ឲ្យសព្វាវុធជាច្រើនទៅដល់រុស្ស៊ី ដូចជា គ្រាប់សម្រាប់បំពាក់លើកាំភ្លើងធំ ប្រព័ន្ធរ៉ុកកែត និងកាំភ្លើងត្បាល់ ដោយសារតែរុស្ស៊ីកំពុងត្រូវការសព្វាវុធទាំងនេះសម្រាប់គាំទ្រយុទ្ធសាស្ត្រប្រយុទ្ធនៅអ៊ុយក្រែន ជាពិសេសនៅរដូវរងាខាងមុខដែលជាឱកាសដ៏ល្អសម្រាប់កងកម្លាំងទីក្រុងមូស្គូក្នុងការវាយលុក ។

ចំណែកអ្វីដែលកូរ៉េខាងជើងនឹងទទួលបានពីរុស្ស៊ីជាទ្រនាប់ដៃដឹកត្រលប់ទៅប្រទេសវិញនោះ គឺការផ្ដល់ប្រេង និងឧស្ម័នថោកៗជាថ្នូរនឹងការផ្គត់ផ្គង់អាវុធទៅឲ្យលោក ពូទីន ។ អ្វីដែលសំខាន់ជាងនេះទៅទៀតនោះ គឺការផ្ដល់ស្បៀងអាហារទៅឲ្យរដ្ឋាភិបាលទីក្រុងព្យុងយ៉ាង ។

បច្ចុប្បន្នកូរ៉េខាងជើងកំពុងត្រូវការស្បៀងអាហារផ្ដល់ឲ្យប្រជាជនដែលខ្វះខាតអាហារូបត្ថម្ភ ខណៈដែលរដូវប្រមូលផលនៅក្នុងប្រទេសកំពុងខាតចុងខាតដើម ដោយសារតែគ្រោះមហន្តរាយធម្មជាតិបណ្ដាលមកពីខ្យល់ព្យុះ និងភ្លៀងធ្លាក់ខ្លាំងជាដើម ។

ស្របពេលជាមួយគ្នានេះ កូរ៉េ​ខាង​ជើង​ក៏​កំពុង​ទន្ទឹង​រង់​ចាំ​ចំណេះដឹងអំពី​បច្ចេក​វិទ្យា​ជំរុញ​នុយក្លេអ៊ែរ​សម្រាប់​កង​ទ័ព​ជើង​ទឹក​របស់​ខ្លួនផងដែរ បន្ទាប់ពីថ្មីៗនេះទីក្រុងព្យុងយ៉ាងក៏ទើបតែបញ្ចេញនាវាមុជទឹកវាយប្រហារនុយក្លេអ៊ែរ ប៉ុន្តែតាមពិតទៅ វាគឺជានាវាមុជទឹកប្រើម៉ាស៊ូត និងអគ្គិសនីប៉ុណ្ណោះ ។ ដូច្នេះរឿងរ៉ាវនេះហើយទើបលោក គីម ចង់បំប្លែងនាវាមុជទឹករបស់គាត់ និងសាងសង់នាវាថ្មីដែលដំណើរការដោយថាមពលនុយក្លេអ៊ែរ ហើយមានតែរុស្ស៊ីនេះឯងដែលអាចជួយកូរ៉េខាងជើងបាន ។

គួរបញ្ជាក់ថា ជំនួបលោក គីម និងលោក ពូទីន ម្ដងនេះនឹងក្លាយជាជំនួបកំពូលលើកទី ២ បន្ទាប់ពីមេដឹកនាំទាំងពីបានជួបគ្នាម្ដងរួចទៅហើយនៅឆ្នាំ ២០១៩ ក្នុងដំណើរទស្សនកិច្ចលើកចុងក្រោយរបស់លោក គីម នៅក្រៅប្រទេស ក្រោយពិភពលោកជួបប្រទះវិបត្តិជំងឺរាតត្បាតកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ កូរ៉េខាងជើង បញ្ជាក់គោលដៅនៃដំណើរទស្សនកិច្ច របស់លោក គីម ទៅ រុស្ស៊ី