ថៃ ប្រកាសអនុវត្តវិធានការ ឲ្យកសិករផ្អាកសងបំណុល នៅចុងឆ្នាំនេះ

នាយករដ្ឋមន្ត្រីថៃ លោក សេតថា ថាវីស៊ីន បានប្រកាសកាលពីថ្ងៃអង្គារទី១២ខែកញ្ញាថា នៅត្រីមាសទីបួននៃឆ្នាំនេះ រដ្ឋាភិបាល នឹងអនុវត្តការផ្អាកសងបំណុលរបស់កសិករ ដែលការផ្អាកនេះគឺគិតទាំងប្រាក់ដើម និងការប្រាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងនេះ នឹងទទួលបានការអនុម័តដោយគណៈរដ្ឋមន្ត្រី ក្នុងកិច្ចប្រជុំលើកដំបូងរបស់ខ្លួននៅថ្ងៃពុធទី១៣ខែកញ្ញា។ ក្រៅពីគម្រោងនេះ នៅមានវិធានការបន្ទាន់ផ្សេងទៀត ដែលមានគោលបំណងជួយសម្រួលដល់ជីវភាពរបស់នៅរបស់ប្រជាជន និងជំរុញសេដ្ឋកិច្ច។

ទន្ទឹមនឹងការអនុវត្តគម្រោងពន្យារពេលសងបំណុលនេះ លោក សេតថា សង្កត់ធ្ងន់ថា រដ្ឋាភិបាលថៃ ក៏នឹងលើកកម្ពស់ការចែករំលែកចំណេះដឹង និងការប្រើប្រាស់បច្ចេកវិទ្យាផងដែរ ដើម្បីឲ្យកសិករ អាចកាត់បន្ថយការចំណាយ និងបង្កើនប្រាក់ចំណូលរបស់ពួកគេ។

ការធ្វើកសិកម្មច្បាស់លាស់ និងការប្រើប្រាស់ជីសរីរាង្គជំនួសឲ្យជីគីមី គឺជាវិធានការដែលកសិករនឹងត្រូវបានលើកទឹកចិត្តឲ្យអនុវត្ត។

លោកក៏បានអះអាងដែរ​ថា ការ​ផ្អាក​នេះ ​នឹង​មិន​ប៉ះពាល់​ដល់​ការ​អនុវត្ត​របស់​រដ្ឋាភិបាល ​ចំពោះ​វិន័យ​សារពើពន្ធទេ។

ទោះបីជាយ៉ាងណាក៏ដោយ បើយោងតាមប្រភពពីក្រសួងហិរញ្ញវត្ថុ, ការផ្អាកសងបំណុលនេះ នឹងដំណើរការរយៈពេល៣ឆ្នាំ ប៉ុន្តែសម្រាប់តែកសិករខ្នាតតូច ដែលមានចំនួនប្រាក់កម្ចីមិនលើសពី១លានបាតក្នុងម្នាក់ប៉ុណ្ណោះ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ នាយករដ្ឋមន្ត្រីថៃ ប្តេជ្ញាជួយដោះស្រាយបញ្ហាបំណុល របស់ប្រជាជន