យន្តហោះចម្បាំង ចិន ចំនួន ២៨ គ្រឿងហោះចូលក្នុងតំបន់ការពារដែន​អាកាសរបស់ តៃវ៉ាន់

ក្រសួងការពារជាតិតៃវ៉ាន់បាននិយាយថា យន្តហោះចម្បាំងរបស់កងទ័ពអាកាសចិនចំនួន ២៨ គ្រឿងបានហោះហើរចូលមកក្នុងតំបន់ការពារដែនអាកាសរបស់ខ្លួននៅព្រឹកថ្ងៃពុធ ទី១៣ ខែកញ្ញានេះ ចំពេលមានភាពតានតឹងកាន់តែខ្លាំងឡើងនៅទូទាំងច្រកសមុទ្រតៃវ៉ាន់ ។

ក្រសួងការពារជាតិតៃវ៉ាន់ឲ្យដឹងទៀតថា នៅវេលាម៉ោងប្រហែល ៦ ព្រឹក យន្តហោះចម្បាំងរបស់កងទ័ពចិនប្រមាណ ២៨ គ្រឿង រួមទាំងយន្តហោះចម្បាំង J-10 បានហោះហើរចូលមកក្នុងតំបន់កំណត់អត្តសញ្ញាណការពារដែនអាកាស (ADIZ) នៃភាគនិរតីកោះតៃវ៉ាន់ ។

ស្របពេលជាមួយគ្នានោះ យន្តហោះចម្បាំងចិនមួយចំនួនក៏បានហោះឆ្លងកាត់ច្រក Bashi ដើម្បីធ្វើសមយុទ្ធជាមួយនាវាផ្ទុកយន្តហោះចិន Shandong នៅតំបន់ប៉ាស៊ីហ្វិកផងដែរ ។

ទន្ទឹមនោះ កងកម្លាំងដែនអាកាសតៃវ៉ាន់ក៏កំពុងតាមដានស្ថានការណ៍ពាក់ព័ន្ធទាំងអស់ ជាពិសេសតៃវ៉ាន់ក៏បញ្ជូនយន្តហោះចម្បាំង និងការអនុវត្តប្រព័ន្ធការពារដែនអាកាស ដើម្បីជាការឆ្លើយតបទៅសកម្មភាពរបស់កងទ័ពអាកាសចិនផងដែរ ។

គួរបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលទីក្រុងប៉េកាំងបាននិងកំពុងបង្កើនប្រតិបត្តិការយោធារបស់ខ្លួននៅជុំវិញកោះតៃវ៉ាន់ ដើម្បីឆ្លើយតបទៅនឹងការឃុបឃិតគ្នារវាងកងកម្លាំងឯករាជ្យតៃវ៉ាន់ និងសហរដ្ឋអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ តើ ពូទីន នឹងឲ្យ កូរ៉េខាងជើង ដឹកអ្វីទៅប្រទេសវិញ ហើយ រុស្ស៊ី ទទួលបានអ្វី ពី គីម ជុងអ៊ុន?