ឥណ្ឌូណេស៊ី គ្រោងហាមឲ្យមិនលក់ទំនិញលើបណ្ដាញសង្គម

បើយោងតាមអនុរដ្ឋមន្ត្រីក្រសួងពាណិជ្ជកម្មឥណ្ឌូណេស៊ីលោក លោក Jerry Sambuaga បានឲ្យដឹងថា ប្រទេសឥណ្ឌូណេស៊ីគ្រោងនឹងហាមឃាត់ការលក់ទំនិញនៅលើប្រព័ន្ធផ្សព្វផ្សាយសង្គមក្រោមបទប្បញ្ញត្តិពាណិជ្ជកម្មថ្មី ។

លោករដ្ឋមន្ត្រីបញ្ជាក់ថា អ្នកលក់ពាណិជ្ជកម្មអេឡិចត្រូនិចដោយប្រើការកំណត់តម្លៃថោកនៅលើវេទិកាប្រព័ន្ធផ្សព្វផ្សាយសង្គម កំពុងគំរាមកំហែងទីផ្សារក្រៅបណ្តាញនៅក្នុងប្រទេសដែលមានសេដ្ឋកិច្ចដ៏ធំបំផុតរបស់អាស៊ីអាគ្នេយ៍មួយនេះ ។

ទន្ទឹមនោះ លោក Sambuaga ក៏ប្រាប់សភាឥណ្ឌូណេស៊ីផងដែរថា ប្រព័ន្ធផ្សព្វផ្សាយសង្គមនិងពាណិជ្ជកម្មសង្គម គឺមិនអាចរួមបញ្ចូលគ្នាបានទេ ហើយបទ​បញ្ញតិ្តពាណិជ្ជកម្មនេះ កំពុងតែដំណើរការ ។

ជាការឆ្លើយតប TikTok បាននិយាយថា ការបំបែកប្រព័ន្ធផ្សព្វផ្សាយសង្គម និងពាណិជ្ជកម្ម តាមប្រព័ន្ធអេឡិចត្រូនិក ទៅជាវេទិកាផ្សេងៗគ្នា នឹងធ្វើឲ្យអាជីវករ និងអ្នកប្រើប្រាស់ឥណ្ឌូណេស៊ីខូចប្រយោជន៍ដូចគ្នា ខណៈឥណ្ឌូណេស៊ីមានអ្នកប្រើប្រាស់ TikTok ដល់ ១២៥ លាននាក់ ហើយមានអាជីវកម្មខ្នាតតូចចំនួន ២ លានគណនី ខណៈសម្រាប់បណ្តាញសង្គមផ្សេងទៀត ដូចជា Facebook ជាដើម នៅមិនទាន់មានការឆ្លើយតបឡើយទេ ។

បើយោងតាមទិន្នន័យពីក្រុមហ៊ុនប្រឹក្សា Momentum Works បានឲ្យដឹងថា ឥណ្ឌូណេស៊ីរកបាន ៥២​ ពាន់លានដុល្លារ នៃប្រតិបត្តិការពាណិជ្ជកម្មតាមអេឡិចត្រូនិកកាលពីឆ្នាំមុន ខណៈវិស័យពាណិជ្ជកម្មអេឡិចត្រូនិកឥណ្ឌូណេស៊ីរំពឹងថានឹងកើនឡើងដល់ ៩៥ ពាន់លានដុល្លារនៅឆ្នាំ ២០២៥ ៕

ប្រែសម្រួល៖ នាង រតនៈ

ប្រភព៖ Nikkei Asia