សេចក្តីថ្លែងការណ៍សំខាន់ៗ ៥ ចំណុចក្នុងជំនួបលោក ពូទីន និង គីម ជុងអ៊ុន

ប្រធានាធិបតីរុស្ស៊ីលោក វ្ល៉ាឌីមៀរ ពូទីន និងមេដឹកនាំកូរ៉េខាងជើងលោក គីម ជុងអ៊ុន នៅថ្ងៃពុធនេះបានជួបពិភាក្សាគ្នាអស់រយៈពេលជាង ១ ម៉ោងនៅឯទីលានបាញ់បង្ហោះយានអវកាស Vostochny Cosmodrome ហើយមេដឹកនាំទាំងពីរក៏បានចេញសេចក្ដីថ្លែងការណ៍សំខាន់ៗចំនួន ៥ ចំណុចដូចជា៖

▪️ លោក វ្ល៉ាឌីមៀរ ពូទីន និយាយថា ដំណើរទស្សនកិច្ចរបស់លោក គីម ជុងអ៊ុន មកកាន់ប្រទេសរុស្ស៊ី គឺធ្វើឡើងក្នុងបរិយាកាសមិត្តភាព ។

▪️ ប្រធានាធិបតីរុស្ស៊ី ក្នុងជំនួបជាមួយមេដឹកនាំកូរ៉េខាងជើង បានលើកឡើងថា ប្រទេសទាំងពីរបានធ្វើសកម្មភាពក្នុងនាមសន្តិភាព ស្ថិរភាព និងវិបុលភាពក្នុងតំបន់ ។

▪️ លោក ពូទីន ៖ លោក គីម ជុងអ៊ុន ដើរតាមគន្លងរបស់ជីតា គីម អ៊ីលស៊ុង និងលោកឪពុក គីម ជុងអ៊ីល ដែលជាមិត្តភ័ក្រ្តដ៏ស្មោះស្ម័គ្រ និងជាអ្នកគាំទ្រការកសាងទំនាក់ទំនងជាមួយរុស្ស៊ី ។

▪️ ចំណែកលោក គីម ជុងអ៊ុន វិញបាននិយាយថា លោកបានពិភាក្សាអំពីស្ថានភាពនៅឧបទ្វីបកូរ៉េ និងនៅអឺរ៉ុប ក៏ដូចជាពិភាក្សាអំពីកិច្ចសហប្រតិបត្តិការយុទ្ធសាស្ត្រជាមួយលោក ពូទីន ផងដែរ ។

▪️ មេដឹកនាំកូរ៉េខាងជើងរូបនេះបញ្ជាក់ថា ការអភិវឌ្ឍន៍ទំនាក់ទំនងរវាងកូរ៉េខាងជើង-រុស្ស៊ី ឆ្លើយតបនឹងផលប្រយោជន៍របស់ប្រទេស ហើយទីក្រុងព្យុងយ៉ាងមានបំណងកសាងទំនាក់ទំនងរយៈពេលវែងជាមួយទីក្រុងមូស្គូ ។

គួរបញ្ជាក់ថា នេះគឺជាជំនួបកំពូលលើកទី ២ រវាងលោក គីម និងលោក ពូទីន បន្ទាប់ពីមេដឹកនាំទាំងពីបានជួបគ្នាម្ដងរួចទៅហើយនៅឆ្នាំ ២០១៩ ក្នុងដំណើរទស្សនកិច្ចលើកចុងក្រោយរបស់លោក គីម នៅក្រៅប្រទេស ក្រោយពិភពលោកជួបប្រទះវិបត្តិជំងឺរាតត្បាតកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក ពូទីន ប្រាប់ គីម ជុងអ៊ុន ថា រុស្ស៊ី នឹងជួយ កូរ៉េខាងជើង ក្នុងកម្មវិធី​សំខាន់ៗចំនួន ២