លីប៊ី ដាក់តួលេខអ្នកស្លាប់ដោយសារគ្រោះទឹកជំនន់ ឡើងដល់ ២០០០០នាក់

ចំនួនអ្នកស្លាប់នៅក្នុងទីក្រុង Derna នៃប្រទេសលីប៊ី អាចមានចាប់ពី ១៨,០០០ ទៅ ២០,០០០នាក់ឯណោះ បន្ទាប់ពីគ្រោះទឹកជំនន់ដ៏មហន្តរាយ។ នេះបើយោងតាមការអះអាងពីអភិបាលក្រុង។

លោក Abdulmenam Al-Ghaithi បានប្រាប់ទូរទស្សន៍ al-Arabiya នៅថ្ងៃព្រហស្បតិ៍ទី១៤ខែកញ្ញាថា តួលេខនេះគឺផ្អែកលើចំនួនដែលត្រូវកម្ទេចកម្ទីបានសង្កត់លើនៅក្នុងទីក្រុង។

កាលពីដើមសប្តាហ៍ មន្ត្រីលីប៊ី បានអំពាវនាវសុំជំនួយអន្តរជាតិ ដោយព្រមានថា ប្រទេសនេះមិនមានបទពិសោធន៍ក្រាស់ក្រែល ដើម្បីដោះស្រាយជាមួយនឹងគ្រោះមហន្តរាយធំបែបនេះទេ។

ស្របពេលជាមួយគ្នានោះដែរ មនុស្សប្រមាណ៣០០០០នាក់ ត្រូវផ្លាស់ទីលំនៅ ក្នុងទីក្រុង Derna ខណៈក្រុមស្វែងរក បាននិងកំពុង រុករកតាមដងផ្លូវ អគារបាក់បែក និងសូម្បីតែក្នុងសមុទ្រ ដើម្បីស្វែងរកសាកសពនៅទីក្រុងឆ្នេរលីប៊ី ជាកន្លែងដែលការបាក់ទំនប់វារីអគ្គិសនីចំនួនពីរ បានបណ្តាលឲ្យមានគ្រោះទឹកជំនន់ភ្លាមៗ។

ព្យុះ Daniel បានបង្កការខូចខាតយ៉ាងធំធេងដល់ផ្លូវថ្នល់ និងបណ្តាញទូរគមនាគមន៍ ខណៈខ្យល់បក់ខ្លាំង និងភ្លៀងធ្លាក់ធ្ងន់ធ្ងរ បានបំផ្លិចបំផ្លាញទីក្រុងកំពង់ផែ Derna ចម្ងាយប្រហែល ៩០០គីឡូម៉ែត្រ ភាគខាងកើតរដ្ឋធានីទ្រីប៉ូលី។

ប្រទេសជិតខាងលីប៊ីដូចជា អេហ្ស៊ីប អាល់ហ្សេរី និងទុយនីស៊ី ក៏ដូចជាតួកគី និងអារ៉ាប់រួម ផងដែរ សុទ្ធតែបានបញ្ជូនក្រុមជួយសង្គ្រោះ និងជំនួយមនុស្សធម៌។

ទន្ទឹមនោះ លោក ចូ បៃដិន ក៏បាននិយាយដែរថា សហរដ្ឋអាមេរិក បានបញ្ជូនមូលនិធិសង្គ្រោះបន្ទាន់ទៅកាន់បណ្តាលអង្គការសង្គ្រោះ ហើយកំពុងសម្របសម្រួលជាមួយអាជ្ញាធរលីប៊ី និងអង្គការសហប្រជាជាតិ ដើម្បីផ្តល់ជំនួយបន្ថែម៕

ប្រែសម្រួល៖ Vann Vann

ប្រភព៖ SKY