ក្រៅពីសម្ដេចធិបតី ហ៊ុន ម៉ាណែត តើថ្នាក់ដឹកនាំប្រទេសណាទៀតចូលរួម​ពិព័រណ៍ ចិន-អាស៊ាន ថ្ងៃនេះ?

អ្នកនាំពាក្យក្រសួងការបរទេសចិន លោកស្រី Mao Ning បានប្រកាសថា នាយករដ្ឋមន្ត្រីចិន លោក Li Qiang នឹងចូលរួម ក៏ដូចជាថ្លែងបើកពិព័រណ៍ ចិន-អាស៊ាន លើកទី ២០ និងកិច្ចប្រជុំកំពូលពាណិជ្ជកម្ម និងវិនិយោគ ចិន-អាស៊ាន នៅទីក្រុងណាននីង នៃតំបន់ស្វយ័ត Guangxi Zhuang ភាគខាងត្បូងប្រទេសចិននៅថ្ងៃទី១៧ ខែកញ្ញានេះ ។

ទន្ទឹមនោះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលកំពុងបំពេញទស្សនកិច្ចផ្លូវការនៅប្រទេសចិន ក៏បានអញ្ជើញចូលរួមក្នុងពិព័រណ៍ ចិន-អាស៊ាន លើកទី២០ និងកិច្ចប្រជុំកំពូលពាណិជ្ជកម្ម និងវិនិយោគ ចិន-អាស៊ាន នោះផងដែរ ហើយក្រៅពីសម្ដេចធិបតី ក៏មានថ្នាក់ដឹកនាំ និងមន្ត្រីជាន់ខ្ពស់អាស៊ានផ្សេងទៀតលេចវត្តមានក្នុងពិព័រណ៍នោះផងដែរដូចជា៖

-នាយករដ្ឋមន្ត្រីឡាវ លោក Sonexay Siphandone

-នាយករដ្ឋមន្ត្រីម៉ាឡេស៊ី លោក Anwar Ibrahim

-នាយករដ្ឋមន្ត្រីវៀតណាមលោក Pham Minh Chinh

-អនុប្រធានាធិបតីឥណ្ឌូណេស៊ីលោក Ma’ruf Amin

-ឧបនាយករដ្ឋមន្ត្រី និងរដ្ឋមន្ត្រីក្រសួងពាណិជ្ជកម្មថៃ លោក Phumtham Wechayachai

-លោក កៅ គឹមហួន អគ្គលេខាធិការអាស៊ាន

គួរបញ្ជាក់ថា សម្ដេចមហាបវរធិបតី ហ៊ុន ម៉ាណែត នឹងអញ្ជើញត្រលប់មកព្រះរាជាណាចក្រកម្ពុជាវិញនៅយប់ថ្ងៃទី១៧ ខែកញ្ញានេះតែម្ដង បន្ទាប់ពីបញ្ចប់ដំណើរបំពេញទស្សនកិច្ចផ្លូវការជាលើកដំបូងទៅកាន់ប្រទេសចិនក្នុងរយៈពេល ៤ ថ្ងៃ ៕

ប្រែសម្រួលដោយ ៖ ជីវ័ន្ត

ប្រភព ៖ FMPRC

ចុចអាន ៖ ប្រធានាធិបតី ចិន បង្ហាញឆន្ទៈបន្តកិច្ចសហប្រតិបត្តិការបង្ក្រាបឧក្រិដ្ឋកម្ម ឆ្លងដែនជាមួយ កម្ពុជា