ព័ត៌មានអន្ដរជាតិ

ថៃ នឹងដំឡើងប្រាក់ឈ្នួលប្រចាំថ្ងៃសម្រាប់កម្មករនៅក្នុងខែវិច្ឆិកា

បានផុស

២ years មុន

នៅ

ថ្ងៃសៅរ៍ ១៦ កញ្ញា ២០២៣

ដោយ

កាលពីថ្ងៃសុក្រទី១៥ខែកញ្ញា រដ្ឋមន្ត្រីក្រសួងការងារ លោក Phiphat Ratchakitprakarn បានសន្យាថា ប្រាក់ឈ្នួលប្រចាំថ្ងៃអប្បបរមាសម្រាប់កម្មករថៃ នឹងត្រូវដំឡើងនៅខែវិច្ឆិកា ។

លោក Phiphat Ratchakitprakarn (រូបថត៖ Bangkok Post)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Phiphat និយាយថា “ប្រាក់ឈ្នួលអប្បបរមាប្រចាំថ្ងៃ នឹងត្រូវដំឡើងក្នុងឆ្នាំនេះ ហើយសំណើ នឹងត្រូវដាក់ជូនគណៈរដ្ឋមន្ត្រីពិចារណានៅថ្ងៃទី២៥ខែកញ្ញា ដើម្បីឲ្យប្រាក់ឈ្នួលថ្មីសម្រាប់ប្រជាជនថៃអាចធ្វើទៅបានក្នុងខែវិច្ឆិកា” ។

រដ្ឋមន្ត្រីបានថ្លែងបែបនេះ អំឡុងពេលលោកធ្វើដំណើរទៅកាន់ការិយាល័យកណ្តាលរបស់សហព័ន្ធឧស្សាហកម្មថៃ (FTI)។ នៅទីនោះ លោកនិងមន្ត្រីជាន់ខ្ពស់ FTI បានពិភាក្សាអំពីការដំឡើងប្រាក់ឈ្នួលអប្បបរមា និងតម្រូវការដើម្បីបង្កើនផលិតភាពការងារ។

លោក Phiphat បង្ហើបថា “ខ្ញុំបានពិភាក្សាអំពីការដំឡើងប្រាក់ឈ្នួលជាមួយ FTI ដែលជាតំណាងវិស័យធុរកិច្ច ព្រោះពួកគេយល់ច្បាស់ពីបញ្ហាការងារ។ ខ្ញុំដឹងពីកង្វល់ធំ នៅក្នុងវិស័យឯកជន ទាក់ទងនឹងសំណើដំឡើងប្រាក់ឈ្នួលអប្បបរមា ហើយខ្ញុំនឹងពិភាក្សាជាមួយភ្នាក់ងារពាក់ព័ន្ធ នូវសំណើដែលខ្ញុំបានទទួលនៅថ្ងៃនេះ ដើម្បីដោះស្រាយបញ្ហាឲ្យបានច្បាស់ ដោយមិនមានផលប៉ះពាល់ធ្ងន់ធ្ងរដល់និយោជក និងជាមួយលទ្ធផលដែលអាចទទួលយកបានសម្រាប់និយោជិត”។

ទោះបីជាយ៉ាងណាក៏ដោយ លោក Phiphat មិនបានបញ្ជាក់ថាតើ ប្រាក់ឈ្នួលប្រចាំថ្ងៃអប្បបរមានឹងត្រូវដំឡើងប៉ុន្មាននោះទេ ប៉ុន្តែមុននេះ លោកនាយករដ្ឋមន្ត្រី សេតថា ថាវីស៊ីន ធ្លាប់លើកឡើងថា ប្រាក់ឈ្នួល គួរតែបង្កើនដល់ ៤០០ បាតក្នុងមួយថ្ងៃ នៅត្រឹមចុងឆ្នាំ២០២៣។

គួរបញ្ជាក់ថា ប្រាក់ឈ្នួលប្រចាំថ្ងៃអប្បបរមារបស់ប្រទេសថៃ គឺមានចន្លោះពី ៣២៨ទៅ ៣៥៤បាត អាស្រ័យតាមខេត្ត៕

ប្រែសម្រួល៖ Vann Vann

ប្រភព៖ Nation

ចុចអាន៖ ថៃ ប្រកាសអនុវត្តវិធានការ ឲ្យកសិករផ្អាកសងបំណុល នៅចុងឆ្នាំនេះ