មេទ័ពអាមេរិក ថា ទីក្រុងវ៉ាស៊ីនតោន ត្រូវធ្វើគ្រប់យ៉ាង ដើម្បីចៀសវាងជម្លោះប្រដាប់អាវុធបើកចំហជាមួយ ចិន

ប្រធានអគ្គសេនាធិការចម្រុះអាមេរិក លោកឧត្តមសេនីយ៍ Mark Milley បាននិយាយកាលពីថ្ងៃអាទិត្យទី១៧ខែកញ្ញាថា សហរដ្ឋអាមេរិក គួរតែធ្វើអ្វីគ្រប់យ៉ាងដែលអាចធ្វើទៅបាន ដើម្បីចៀសវាងជម្លោះប្រដាប់អាវុធដោយបើកចំហជាមួយប្រទេសចិន ហើយកុំធ្វើសង្រ្គាមមហាអំណាចម្តងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Milley និយាយក្នុងបទសម្ភាសជាមួយបណ្តាញព័ត៌មានអាមេរិកថា “យើងគួរតែព្យាយាមឲ្យអស់ពីសមត្ថភាពរបស់យើង ដើម្បីចៀសវាងជម្លោះប្រដាប់អាវុធបើកចំហជាមួយប្រទេសចិន”។

ដោយសំដៅទៅសង្គ្រាមលោកលើកទី១ និងសង្គ្រាមលោកលើកទី២, មេទ័ពរូបនេះបន្ថែមថា សហរដ្ឋអាមេរិកបានចូលរួមក្នុងសង្រ្គាមមហាអំណាចចំនួនពីរដងរួចមកហើយ។

ដោយឡែកនិយាយអំពីការវាយលុករបស់ចិនលើកោះតៃវ៉ាន់វិញ, លោក Milley បានលើកឡើងថា “វាអាចទៅរួច សម្រាប់សហរដ្ឋអាមេរិកដើម្បីទប់ទល់ការវាយប្រហារ។ ទីក្រុងវ៉ាស៊ីនតោនចង់បានលទ្ធផលសន្តិភាពរវាងទីក្រុងប៉េកាំង និងតៃប៉ិ”។

តៃវ៉ាន់ ត្រូវបានគ្រប់គ្រងដោយឯករាជ្យពីចិនដីគោកចាប់តាំងពីឆ្នាំ១៩៤៩មក ហើយទីក្រុងប៉េកាំង ចាត់ទុកកោះនេះជាខេត្តរបស់ខ្លួន ខណៈតៃវ៉ាន់នៅតែអះអាងថាខ្លួនជាអង្គភាពស្វយ័ត ប៉ុន្តែមិនប្រកាសឯករាជ្យ។

លើសពីនេះ ទីក្រុងប៉េកាំងបានប្រឆាំងរាល់ទំនាក់ទំនងបរទេសផ្លូវការជាមួយតៃប៉ិ ហើយចាត់ទុកអធិបតេយ្យរបស់ចិនលើកោះនេះ ថាមិនអាចប្រកែកបាន៕

ប្រែសម្រួល៖ Vann Vann

ប្រភព៖ Sputnik

ចុចអាន៖​ ដោយសារអ៊ុយក្រែន, អាមេរិក ត្រូវសម្រុកផលិតគ្រាប់កាំភ្លើងធំឲ្យបាន ១០ម៉ឺនគ្រាប់ក្នុងមួយខែ ត្រឹមឆ្នាំ២០២៥