កូរ៉េខាងត្បូង គំរាមសងសឹកចាស់ដៃ ហើយថា កូរ៉េខាងជើង នឹងចប់ បើ គីម ជុងអ៊ុន បាញ់នុយក្លេអ៊ែរមែន

ប្រធានាធិបតីកូរ៉េខាងត្បូង លោក Yoon Suk Yeol បានព្រមានថា ទីក្រុងសេអ៊ូលនិងវ៉ាស៊ីនតោន នឹងសងសឹកចាស់ដៃ ប្រសិនបើកូរ៉េខាងជើងងាកទៅរកការប្រើប្រាស់អាវុធនុយក្លេអ៊ែរមែននោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Yoon បាននិយាយក្នុងបទសម្ភាសន៍ជាមួយ AP កាលពីថ្ងៃអាទិត្យទី១៧ខែកញ្ញាថា សហរដ្ឋអាមេរិកនិងកូរ៉េខាងត្បូងសូមបញ្ជាក់ជាថ្មីថា រាល់ការវាយប្រហារនុយក្លេអ៊ែរដោយកូរ៉េខាងជើង នឹងត្រូវបានឆ្លើយតបយ៉ាងរហ័ស លើសលប់ និងចាស់ដៃតែម្តង។

លោកបន្តថា ការសម្រេចចិត្តរបស់ប្រទេសជិតខាង ក្នុងការដាក់ពង្រាយអាវុធនុយក្លេអ៊ែរនឹង ធ្វើឲ្យរបបនៅក្នុងទីក្រុងព្យុងយ៉ាង ឈានដល់ទីបញ្ចប់។

បទសម្ភាសរបស់លោក Yoon បានចេញផ្សាយចំថ្ងៃចុងក្រោយ នៃដំណើរទស្សនកិច្ចរបស់លោក គីម ជុងអ៊ុន នៅប្រទេសរុស្ស៊ី ដែលនោះជាដំណើរបង្កក្តីបារម្ភក្នុងប្រទេសកូរ៉េខាងត្បូង និងលោកខាងលិច។

មេដឹកនាំ​កូរ៉េ​ខាងជើង ​បានទៅរុស្ស៊ី ​តាំងតែពី​ថ្ងៃ​អង្គារសប្តាហ៍មុនមកម្ល៉េះ ដោយ​ជួប​ពិភាក្សា​ជាមួយ​ប្រធានាធិបតី​រុស្ស៊ី​លោក វ្ល៉ាឌីមៀរ ពូទីន និង​រដ្ឋមន្ត្រី​ការពារជាតិ Sergey Shoigu។

គាត់ក៏បានត្រួតពិនិត្យស្ថានីយបាញ់បង្ហោះយានអវកាស Vostochny Cosmodrome និងរោងចក្រអាកាសចរណ៍នៅតំបន់ចុងបូព៌ារុស្ស៊ីផងដែរ ហើយរុស្ស៊ី ក៏បានបង្ហាញគ្រឿងយោធាជាច្រើន រួមទាំងយន្តហោះទម្លាក់គ្រាប់បែកយុទ្ធសាស្ត្រ ដែលមានសមត្ថភាពនុយក្លេអ៊ែរដល់លោក គីម ទៀតផង។

សូមបញ្ជាក់ថា ប្រទេសកូរ៉េខាងជើង ដែលធ្វើតេស្តមីស៊ីលផ្លោងជាបន្តបន្ទាប់ក្នុងឆ្នាំនេះ បានព្រមានជាច្រើនដងមកហើយថា ខ្លួនមិនស្ទាក់ស្ទើរឡើយក្នុងការប្រើប្រាស់អាវុធនុយក្លេអ៊ែរ ដើម្បីការពារខ្លួន ហើយមេដឹកនាំ គីម ជុងអ៊ុន បាននិយាយកាលពីដើមឆ្នាំនេះថា កងកម្លាំងយុទ្ធសាស្ត្រនុយក្លេអ៊ែររបស់ទីក្រុងព្យុងយ៉ាង បានរៀបចំខ្លួនយ៉ាងល្អឥតខ្ចោះ សម្រាប់បំពេញបេសកកម្មដ៏សំខាន់គ្រប់ពេលវេលា ប្រសិនបើទីក្រុងសេអ៊ូលនិងវ៉ាស៊ីនតោន មិនបញ្ឈប់ការបង្ករឿងទេនោះ៕

ប្រែសម្រួល៖ Vann Vann

ប្រភព៖ RT

ចុចអាន៖ កូរ៉េខាងជើង បញ្ជាក់គោលដៅនៃដំណើរទស្សនកិច្ច របស់លោក គីម ទៅ រុស្ស៊ី