មេដឹកនាំប្រទេសមហាអំណាច ៤ រូបសុទ្ធតែបាត់មុខពីកិច្ចប្រជុំមហាសន្និ​បាតអង្គការសហប្រជាជាតិ

មេដឹកនាំនៃប្រទេសមហាអំណាចចំនួន ៤ រូបមិនបានអញ្ជើញចូលរួមសម័យប្រជុំនៃមហាសន្និបាតអង្គការសហប្រជាជាតិ (UNGA) លើកទី ៧៨ ដែលកំពុងប្រព្រឹត្តទៅនៅទីក្រុងញូវយ៉ករបស់សហរដ្ឋអាមេរិកនោះទេ ប៉ុន្តែបានបញ្ជូនអ្នកតំណាងឲ្យមកអង្គុយប្រជុំជំនួស ។

ប្រធានាធិបតីរុស្ស៊ីលោក Vladimir Putin, លោក Xi Jinping ប្រធានាធិបតីចិន, លោក Emmanuel Macron ប្រធានាធិបតីបារាំង និងលោក Rishi Sunak នាយករដ្ឋមន្ត្រីអង់គ្លេស សុទ្ធតែជាមេដឹកនាំមហាអំណាចដែលមិនបានអញ្ជើញចូលរួមក្នុងកិច្ចពិភាក្សាទូទៅប្រចាំឆ្នាំដែលរៀបចំឡើងនៅរៀងរាល់ខែកញ្ញា ។

ទោះយ៉ាងណា អវត្តមានរបស់លោក Putin និងលោក Xi លើទឹកដីអាមេរិកមិនមែនជារឿងដ៏គួរឲ្យភ្ញាក់ផ្អើលឡើយ ដោយសារតែអាមេរិកនេះហើយជាបងធំកាងអ៊ុយក្រែនក្នុងសង្គ្រាមជាមួយរុស្ស៊ី ខណៈដែលប្រទេសចិនវិញមានបញ្ហាតានតឹង ក៏ដូចជាការប្រកួតប្រជែងដ៏យូរអង្វែងជាមួយរដ្ឋាភិបាលទីក្រុងវ៉ាស៊ីនតោន ។

អ្វីដែលជាការកត់សម្គាល់គឺអវត្តមានរបស់នាយករដ្ឋមន្ត្រីអង់គ្លេស Rishi Sunak និងប្រធានាធិបតីបារាំង Emmanuel Macron ដែលប្រទេសអឺរ៉ុបទាំងពីរនេះសុទ្ធតែកំពុងព្យាយាមជួយស្រោចស្រង់ពហុភាគីនិយម ហើយការបាត់មុខរបស់មេដឹកនាំ ២ រូបនេះទៀតសោត ក៏ហាក់ដូចជាឆ្លុះបញ្ចាំងពីវិបត្តិ និងផលប៉ះពាល់យ៉ាងធ្ងន់ធ្ងរដល់អង្គការសហប្រជាជាតិ ជាពិសេសវាបង្ហាញពីការប្រេះស្រាំនៅក្រោយវាំងននរបស់ស្ថាប័នកំពូលមួយនេះ ។

ស្របពេលជាមួយគ្នានេះ ការបាត់មុខរបស់មេដឹកនាំក្រុមប្រឹក្សាសន្តិសុខទាំង ៤ ក៏ជារោគសញ្ញាមួយផ្សេងទៀតដែលបង្កឡើងដោយសង្រ្គាមនៅអ៊ុយក្រែន និងការប្រជែងគ្នារវាងសហរដ្ឋអាមេរិក និងចិន ខណៈតួអង្គសំខាន់ក្នុងសម័យប្រជុំនោះគឺមានតែលោក Joe Biden និងលោកប្រធានាធិបតីអ៊ុយក្រែន Volodymyr Zelensky ប៉ុណ្ណោះ ។

គួរបញ្ជាក់ថា សម័យប្រជុំនៃមហាសន្និបាតអង្គការសហប្រជាជាតិ (UNGA) លើកទី ៧៨ បានចាប់ផ្ដើមនៅថ្ងៃទី១៩ ខែកញ្ញា និងបញ្ចប់នៅថ្ងៃទី២៦ ខែកញ្ញា មានរបៀបវារៈចំនួន ៤ រួមមាន ការអភិវឌ្ឍន៍ប្រកបដោយនិរន្តរភាព បញ្ហាអាកាសធាតុ ការត្រៀមលក្ខណៈសម្រាប់ជំងឺរាតត្បាត និងតំបន់មានជម្លោះ ខណៈមូលបទចម្បងសម្រាប់កិច្ចពិភាក្សាក្នុងឆ្នាំនេះគឺ “ការកសាងទំនុកចិត្តឡើងវិញ និងបំផុសសាមគ្គីភាពក្នុងពិភពលោក” ៕

ប្រែសម្រួលដោយ ៖ ជីវ័ន្ត

ប្រភព ៖ Lemonde

ចុចអាន ៖ រុស្ស៊ី ថា លោក Zelensky ទៅ អាមេរិក ដើម្បីសុំលុយពីលោកខាងលិច