ចិន ព្រមានចេញពី UN កុំឲ្យពិភពលោក មើលស្រាលឆន្ទៈរបស់ខ្លួន លើបញ្ហាកោះតៃវ៉ាន់

កាលពីថ្ងៃព្រហស្បតិ៍ថ្ងៃទី២១ខែកញ្ញា ប្រទេសចិន បានព្រមាននៅអង្គការសហប្រជាជាតិ កុំឲ្យពិភពលោក មើលស្រាលឆន្ទៈដ៏មុតមាំរបស់ខ្លួនលើបញ្ហាតៃវ៉ាន់ឲ្យសោះ ហើយនិយាយថា ទីក្រុងប៉េកាំង ចង់បានមធ្យោបាយសន្តិវិធីដើម្បីយកកោះនេះមកគ្រប់គ្រង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់មហាសន្និបាត, អនុប្រធានាធិបតី Han Zheng បានលើកឡើងជាថ្មីម្តងទៀត នូវជំហររបស់ទីក្រុងប៉េកាំងដែលថា កោះតៃវ៉ាន់ គឺជាផ្នែកដែលមិនអាចកាត់ផ្តាច់បាន របស់ចិន។

លោកនិយាយថា “គ្មាននរណាម្នាក់ អាចមើលស្រាលការតាំងចិត្តដ៏រឹងមាំ ឆន្ទៈដ៏មុតមាំ និងអំណាចរបស់ប្រជាជនចិន ក្នុងការការពារអធិបតេយ្យ និងបូរណភាពទឹកដីរបស់ពួកគេបានទេ។ ការបង្រួបបង្រួមចិនឲ្យពេញលេញវិញ គឺជាសេចក្តីប្រាថ្នារួមគ្នា របស់កូនប្រុសស្រីទាំងអស់នៃប្រជាជាតិចិន។ យើងនឹងបន្តខិតខំធ្វើការបង្រួបបង្រួមដោយសន្តិវិធី ដោយស្មោះស្ម័គ្រ និងខិតខំប្រឹងប្រែងជាទីបំផុត”។

គួបញ្ជាក់ថា ប្រទេសស្ទើរតែទាំងអស់ បានទទួលស្គាល់ទីក្រុងប៉េកាំងជាជាងតៃប៉ិ ប៉ុន្តែសហរដ្ឋអាមេរិក មានទំនាក់ទំនងក្រៅផ្លូវការដ៏រឹងមាំជាមួយតៃវ៉ាន់ ហើយផ្តល់អាវុធដើម្បីធានាការការពារខ្លួន។

មន្ត្រីអាមេរិកមួយចំនួនបានសម្តែងក្តីបារម្ភថា ចិនកំពុងរៀបជើងព្រួល ដើម្បីប្រើកម្លាំងដណ្តើមយកកោះនេះមកវិញ ជាពិសេសប្រសិនបើតៃវ៉ាន់ ធ្វើសកម្មភាពប្រកាសឯករាជ្យជាផ្លូវការ៕

ប្រែសម្រួល៖ Vann Vann

ប្រភព៖ CNA

ចុចអាន៖ តៃវ៉ាន់ ព្រមានថា ជម្លោះជាមួយចិន នឹងបណ្តាលឲ្យពិភពលោកទាំលមូល ជួបមហន្តរាយ