រុស្ស៊ី បង្កើនសន្តិសុខ យាមកាមផ្នូរលោក Prigozhin ២៤ម៉ោងក្នុងមួយថ្ងៃ

បុគ្គលិកនៅទីបញ្ចុះសព បានប្រាប់កាសែត Moskovsky Komsomolets ថា អាជ្ញាធរបានបង្កើនវិធានការសន្តិសុខ នៅផ្នូររបស់អតីតមេទាហានស៊ីឈ្នួលរុស្ស៊ី Evgeny Prigozhin។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍កាលពីថ្ងៃព្រហស្បតិ៍ទី២១ខែកញ្ញា, ប៉ុស្តិ៍យាមនិងកាមេរ៉ាសុវត្ថិភាព ត្រូវបានដំឡើង បន្ទាប់ពីចោរលួចវីយូឡុងមួយ ពីផ្នូរនៅឯទីបញ្ចុះសព Prokhorovskoe ក្នុងទីក្រុង St. Petersburg។

ឧបករណ៍តន្ត្រីនេះ គឺជានិមិត្តសញ្ញាមួយ ក្នុងចំណោមនិមិត្តសញ្ញាជាច្រើនរបស់ក្រុមហ៊ុនឯកជន Wagner ហើយអ្នកប្រយុទ្ធរបស់ពួកគេ ក៏ត្រូវបានគេដាក់រហ័សនាមថា “តន្ត្រីករ” ផងដែរ។

វីយូឡុង និងញញួរ ត្រូវបានគេដាក់នៅផ្នូររបស់លោក Prigozhin ប៉ុន្មានថ្ងៃបន្ទាប់ពីការបញ្ចុះសពកាលពីថ្ងៃទី២៩ខែសីហា។ ទោះបី​ជា​យ៉ាង​ណាក៏ដោយ បុគ្គលិកនៅកន្លែងបញ្ចុះសពអះអាង​ថា ឧបករណ៍​តន្ត្រី​ ត្រូវបានចោរលួចយកទៅនៅប៉ុន្មានថ្ងៃក្រោយ។

បុគ្គលិករូបនោះបង្ហើបថា “បន្ទាប់ពីនោះ កាមេរ៉ាសុវត្ថិភាព និងប៉ុស្តិ៍យាមកាម ត្រូវបានដំឡើងនៅផ្នូររបស់លោក Prigozhin ហើយឥឡូវ ​មាន​សន្តិសុខ​ប្រចាំការ​នៅ​ទីនោះ ២៤ម៉ោងក្នុងមួយថ្ងៃ។

គួររម្លឹកឡើងវិញ លោក Prigozhin និងឥស្សរជនជាន់ខ្ពស់ក្រុមហ៊ុន Wagner ជាច្រើននាក់ផ្សេងទៀត បានបាត់បង់ជីវិតក្នុងហេតុការណ៍ធ្លាក់យន្តហោះ នៅតំបន់ Tver នៃប្រទេសរុស្ស៊ីកាលពីថ្ងៃទី២៣ខែសីហា។

មូលហេតុនៃឧប្បត្តិហេតុនោះ កំពុងត្រូវបានស៊ើបអង្កេតនៅឡើយ ហើយអ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីចុងខែមុនថា “អំពើឃោរឃៅនេះ គឺបង្កឡើងដោយចេតនារបស់មនុស្ស៕

ប្រែសម្រួល៖ Vann Vann

ប្រភព៖ RT

ចុចអាន៖ ភ្ញាក់ផ្អើល! ចេញវីដេអូមួយ លោក Prigozhin និយាយថា ខ្លួនកំពុងនៅអាហ្វ្រិក