ហេតុអ្វីលោក Zelensky មិនបានជួបតទល់មុខគ្នាជាមួយរដ្ឋមន្ត្រីការបរទេស រុស្ស៊ី នៅកិច្ចប្រជុំ UN?

នេះជាលើកដំបូងហើយដែលលោក Volodymyr Zelensky បានអញ្ជើញចូលរួមដោយផ្ទាល់ក្នុងសម័យប្រជុំនៃមហាសន្និបាតអង្គការសហប្រជាជាតិ (UNGA) លើកទី ៧៨ ក្នុងទីក្រុងញូវយ៉កនៃសហរដ្ឋអាមេរិក ខណៈកាលពីឆ្នាំប្រធានាធិបតីអ៊ុយក្រែនរូបនេះបានត្រឹមថ្លែងសារតាមរយៈវីដេអូប៉ុណ្ណោះ ។

ទន្ទឹមនោះ កិច្ចប្រជុំនេះមិនមានការអញ្ជើញចូលរួមពីសំណាក់ប្រធានាធិបតីរុស្ស៊ីលោក Vladimir Putin នោះទេ ប៉ុន្តែរដ្ឋាភិបាលទីក្រុងមូស្គូបានបញ្ជូនរដ្ឋមន្ត្រីការបរទេសលោក Sergey Lavrov ឲ្យទៅទឹកដីសហរដ្ឋអាមេរិកដើម្បីស្ដាប់កិច្ចពិភាក្សានោះជំនួស ។

ទោះយ៉ាងណា នៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីវិបត្តិនៅអ៊ុយក្រែន លោក Zelensky មិនបានជួបតទល់មុខគ្នាដោយផ្ទាល់ជាមួយនឹងលោក Lavrov នោះទេ ដោយសារតែអ្នកទាំងពីរចេញចូលក្នុងសាលប្រជុំមុនក្រោយគ្នា ។

ក្រោយថ្លែងទៅកាន់ការចាប់ផ្តើមនៃកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិចប់រួចរាល់ហើយ លោក Zelensky ក៏បានអញ្ជើញចាកចេញភ្លាមៗ ខណៈរយៈពេល ២ ម៉ោងក្រោយមកទើបលេចវត្តមានរបស់រដ្ឋមន្ត្រីការបរទេសរុស្ស៊ីលើកឡើងពីរបាយការណ៍របស់ខ្លួន ។

គិតត្រឹមពេលនេះសម័យប្រជុំនៃមហាសន្និបាតអង្គការសហប្រជាជាតិ (UNGA) លើកទី ៧៨ បានឈានដល់ថ្ងៃទី ៥ ហើយ បើទោះបីជាមិនមានការអញ្ជើញចូលរួមពីសំណាក់មេដឹកនាំនៃប្រទេសមហាអំណាចមួយចំនួនផ្សេងទៀតដូចជា លោកប្រធានាធិបតីចិន Xi Jinping, ប្រធានាធិបតីបារាំង Emmanuel Macron និងលោក Rishi Sunak នាយករដ្ឋមន្ត្រីអង់គ្លេសក៏ដោយ ។

គួរបញ្ជាក់ថា សម័យប្រជុំ UNGA នៅឆ្នាំនេះបានចាប់ផ្ដើមនៅថ្ងៃទី១៩ ខែកញ្ញា និងបញ្ចប់នៅថ្ងៃទី២៦ ខែកញ្ញា មានរបៀបវារៈចំនួន ៤ រួមមាន ការអភិវឌ្ឍន៍ប្រកបដោយនិរន្តរភាព បញ្ហាអាកាសធាតុ ការត្រៀមលក្ខណៈសម្រាប់ជំងឺរាតត្បាត និងតំបន់មានជម្លោះ ខណៈមូលបទចម្បងសម្រាប់កិច្ចពិភាក្សាក្នុងឆ្នាំនេះគឺ “ការកសាងទំនុកចិត្តឡើងវិញ និងបំផុសសាមគ្គីភាពក្នុងពិភពលោក” ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera