រុស្ស៊ី ប្រាប់ UN ថា លោកខាងលិច គឺជា ពិភពសំបូរទៅដោយការភូតកុហក

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយដោយមិនសំចៃមាត់នៅឯមហាសន្និបាតអង្គការសហប្រជាជាតិ (UNGA) លើកទី ៧៨ ថា លោកខាងលិចគឺជាពិភពសំបូរទៅដោយការភូតកុហក លាក់ពុត និងមិនគោរពតាមសន្ធិសញ្ញាអន្តរជាតិឡើយ ។

លោក Lavrov បានលើកឡើងថា “សកលលោកភាគច្រើនគឺត្រូវបានបោកបញ្ឆោតដោយលោកខាងលិច ជាពិសេសសហរដ្ឋអាមេរិក និងក្រុមបស្ចិមប្រទេសដែលស្ថិតក្រោមការបង្គាប់បញ្ជារបស់ខ្លួន កំពុងបន្តបញ្ឆេះជម្លោះ ក៏ដូចជាប្រើឧបាយកលទាញមនុស្សជាតិឲ្យធ្លាក់ចូលទៅក្នុងប្លុកអរិភាព និងរារាំងដល់ការសម្រេចបាននូវគោលដៅរួមផងដែរ” ។

ទន្ទឹមនោះ រដ្ឋមន្ត្រីការបរទេសរុស្ស៊ីរូបនេះ​ក៏បាន​ចោទ​ប្រទេស​លោក​ខាង​លិច​ផងដែរថា ​បាន​ធ្វើ​អ្វី​គ្រប់​បែបយ៉ាងតាម​ដែល​ពួក​គេ​អាច​ធ្វើ​ទៅបានដើម្បី​ការពារ​ការ​បង្កើត​សណ្តាប់​ធ្នាប់​ពិភពលោក​ពហុប៉ូល​ពិតប្រាកដ ជាពិសេសពួកគេកំពុងព្យាយាមបង្ខំពិភពលោកឲ្យដើរតាមច្បាប់ដែលគិតតែពីខ្លួនឯង ប៉ុន្តែពិភពលោកមិនចង់រស់នៅក្រោមនឹមរបស់អ្នកណាទៀតនោះទេ ។

ជាក់ស្ដែង រាល់សំណើរបស់អង្គការសហប្រជាជាតិ (UN) មិនដែលចេញជាផ្លែផ្កាណាមួយឡើយ ដោយសារតែលោកខាងលិចមិនបានគោរពតាមការសន្យារបស់ពួកគេចំពោះរដ្ឋាភិបាលទីក្រុងមូស្គូ រួមទាំងការដកទណ្ឌកម្មលើធនាគាររុស្ស៊ី ក៏ដូចជាការភ្ជាប់ប្រព័ន្ធ SWIFT សកលផងដែរ ។

គួរបញ្ជាក់ថា ការថ្លែងសុន្ទរកថារបស់លោក Lavrov បានកើតឡើងនៅឯមហាសន្និបាតអង្គការសហប្រជាជាតិ (UNGA) លើកទី ៧៨ លើទឹកដីនៃទីក្រុងញូវយ៉ករបស់សហរដ្ឋអាមេរិក ហើយក៏ជាកន្លែងដែលអ៊ុយក្រែន និងសម្ព័ន្ធមិត្តលោកខាងលិចបានស្វែងរកការគាំទ្រសម្រាប់រដ្ឋាភិបាលទីក្រុងកៀវផងដែរ ខណៈប្ររទេសនេះកំពុងជាប់ដៃប្រយុទ្ធក្នុងសង្គ្រាមលុកលុយរបស់រុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី ព្យាករណ៍ពីភាពតានតឹងរវាង ប៉ូឡូញ និងអ៊ុយក្រែន ក្រោយការប្រកាស ឈប់ផ្ដល់អាវុធឲ្យទីក្រុងកៀវ