ការស្ទង់មតិ៖ កត្តាធំមួយ នឹងធ្វើឲ្យលោក ត្រាំ ឈ្នះលោក បៃដិន ដាច់ ក្នុងការបោះឆ្នោតឆ្នាំ ២០២៤

ការស្ទង់មតិរបស់សារព័ត៌មាន Washington Post និង ABC News បានរកឃើញថា ប្រសិនបើការបោះឆ្នោតមួយត្រូវបានធ្វើឡើងនៅថ្ងៃនេះ លោក ដូណាល់ ត្រាំ នឹងយកឈ្នះលោក ចូ បៃដិន ដោយសំ​ឡេង ១០ ភាគរយ ខណៈបញ្ហាធំដែលម្ចាស់ឆ្នោតបារម្ភចំពោះប្រធានាធិបតីបច្ចុប្បន្នគឺ កត្តាអាយុ ព្រោះពេលនេះលោក បៃដិន មានវ័យ ៨០ ឆ្នាំទៅហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លទ្ធផលនេះ គឺបង្ហាញពីការនាំមុខដាច់ខ្លាំងបំផុតសម្រាប់លោក ត្រាំ ចាប់តាំងពីបុរសទាំងពីរ ប្រកាសបេក្ខភាព ក្នុងការបោះឆ្នោតឆ្នាំ២០២៤។

ចេញផ្សាយកាលពីថ្ងៃអាទិត្យទី២៤ខែកញ្ញា, ការស្ទង់មតិបានរកឃើញថា ៥២ ភាគរយនៃអ្នកឆ្លើយសំណួរនឹងជ្រើសរើសលោក ត្រាំ ខណៈ ៤២ ភាគរយនៅខាងលោក បៃដិន រីឯអ្នកដែលនៅសល់ គឺមិនទាន់សម្រេចចិត្ត ឬមិនទៅបោះឆ្នោត ។

នៅពេលការស្ទង់មតិដូចគ្នានេះ ធ្វើឡើងកាលពីខែកុម្ភៈ លោក ត្រាំ បាននាំមុខលោក បៃដិន ត្រឹម ៤ ភាគរយប៉ុណ្ណោះ ពោលគឺ ៤៨ ភាគរយទល់នឹង ៤៤ ភាគរយ ។

ទោះបីជាយ៉ាងណាក៏ដោយ មុនពេលទៅតតាំងជាមួយ​លោក បៃដិន ជា​លើក​ទី​ពីរ, លោក ត្រាំ ​ត្រូវ​កម្ចាត់គូ​ប្រជែង​ខាង​គណបក្ស​សាធារណរដ្ឋ​ជាមុនសិន ប៉ុន្តែលោក ត្រាំ តែងតែមានសំឡេងនាំមុខអ្នកសាធារណរដ្ឋផ្សេងទៀតជានិច្ច រាល់ពេលមានការស្ទង់មតិម្តងៗ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ត្រាំ ប្រកាសមិនចូលរួម ការជជែកដេញដោល ប្រធានាធិបតី ខាង គណបក្ស សាធារណរដ្ឋ