កូរ៉េខាងជើង បញ្ជាក់ប្រាប់ កូរ៉េខាងត្បូង ថា ទំនាក់ទំនងជាមួយ រុស្ស៊ី ជារឿង​ធម្មជាតិសម្រាប់ប្រទេសជិតខាង

ប្រទេសកូរ៉េខាងជើងនៅថ្ងៃចន្ទនេះបានថ្កោលទោសប្រធានាធិបតីកូរ៉េខាងត្បូងលោក Yoon Suk Yeol ចំពោះការរិះគន់កិច្ចសហប្រតិបត្តិការរបស់ទីក្រុងព្យុងយ៉ាងជាមួយទីក្រុងមូស្គូ បន្ទាប់ពីដំណើរទស្សនកិច្ចរបស់មេដឹកនាំ គីម ជុងអ៊ុន នៅប្រទេសរុស្ស៊ី ។

ទន្ទឹមនោះ រដ្ឋាភិបាលកូរ៉េខាងជើងថែមទាំងបានបញ្ជាក់ប្រាប់កូរ៉េខាងត្បូងពាក់ព័ន្ធនឹងកិច្ចសហប្រតិបត្តិការរវាងប្រទេសទាំងពីរផងដែរថា វាជាធម្មជាតិ និងជារឿងធម្មតាក្នុងការរក្សាទំនាក់ទំនងជិតស្និទ្ធជាមួយប្រទេសជិតខាង ។

កូរ៉េខាងជើងបានប្រាប់ទីភ្នាក់ងារសារព័ត៌មានរដ្ឋកូរ៉េ KCNA ថា “វាគឺជាធម្មជាតិ និងជារឿងធម្មតា ក្នុងការរក្សាទំនាក់ទំនងជិតស្និទ្ធជាមួយគ្នាទៅវិញទៅមកក្នុងនាមជាប្រទេសជិតខាង ហើយគ្មានហេតុផលណាមួយដែលចាត់ទុកការអនុវត្តវិធានការបែបនេះជាការបង្កហេតុនោះទេ” ។

ការព្រមានរបស់កូរ៉េខាងជើងកើតមានឡើង បន្ទាប់ពីប្រធានាធិបតីកូរ៉េខាងត្បូងលោក Yoon Suk Yeol បានថ្លែងនៅឯមហាសន្និបាតអង្គការសហប្រជាជាតិកាលពីសប្តាហ៍មុនថា ប្រសិនបើរុស្ស៊ីហ៊ានជួយកូរ៉េខាងជើងអភិវឌ្ឍកម្មវិធីអាវុធ ជាថ្នូរនឹងការទទួលបានជំនួយសម្រាប់ធ្វើសង្គ្រាមនៅអ៊ុយក្រែន នោះវានឹងក្លាយជា “ការបង្កហេតុដោយផ្ទាល់” ។

ជាការឆ្លើយតប កូរ៉េខាងជើងបានចេញការរិះគន់ទៅលើលោក Yoon ចំពោះការបង្កាច់បង្ខូចកិច្ចសហប្រតិបត្តិការមិត្តភាពរបស់កូរ៉េខាងជើងជាមួយរុស្ស៊ី ហើយថែមទាំងបានផ្លែផ្កាទៅវិញថា លោក Yoon កំពុងធ្វើជាឧបករណ៍បំពងសំឡេងនាំសារសម្រាប់សហរដ្ឋអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ រុស្ស៊ី ប្រាប់ UN ថា លោកខាងលិច គឺជា ពិភពសំបូរទៅដោយការភូតកុហក