ប្រជាជន វៀតណាម សម្រុកកុម្ម៉ង់ទិញ iPhone 15 រហូតដាច់ស្តុក និងពន្យារពេលដឹកជញ្ជូន

ស៊េរី​ទូរស័ព្ទ iPhone 15 Pro Max នៅវៀតណាមត្រូវបានលក់អស់ពីស្ដុកក្នុងរយៈពេលតែប៉ុន្មាននាទីប៉ុណ្ណោះ បន្ទាប់ពី Apple Store ចាប់ផ្តើមទទួលការបញ្ជាទិញ ហើយបណ្តាលឲ្យការដឹកជញ្ជូនរបស់ពួកគេត្រូវពន្យារពេលរហូតដល់ខែវិច្ឆិកា ។

ទីផ្សារអនឡាញ Apple Store និងឈ្មួញលក់រាយ បានចាប់ផ្តើមទទួលការកុម៉្មង់ទុកមុននៅពាក់កណ្តាលអធ្រាត្រថ្ងៃទី២២ ខែកញ្ញា ខណៈអ្នកទិញសង្ឃឹមថា នឹងទទួលបានទូរស័ព្ទ iPhone 15 នៅថ្ងៃទី២៩ ខែកញ្ញា ប៉ុន្តែថ្ងៃកំណត់នោះប្រហែលជាមានទូរស័ព្ទចំនួនតិចតួចប៉ុណ្ណោះដែលនឹងទទួលបាន ដោយសារតែចំនួននៃការកក់មានការកើនឡើងកាន់តែច្រើន ។

តាមការបញ្ជាក់ពីអ្នកលក់បានឲ្យដឹងថា ​ទូរសព្ទដែលត្រូវបញ្ជាទិញ គឺបានដាច់អស់ចាប់តាំងពីម៉ោង ៤ ព្រឹកមកម្ល៉េះ ខណៈហាងខ្លះបើកលក់មិនដល់ ៥ នាទីផង ។ ទោះយ៉ាងណា អ្នកទិញ iPhone 15 និង 15 Plus ត្រូវរង់ចាំរហូតដល់ថ្ងៃទី៣ ខែតុលា ហើយ iPhone 15 Pro និង 15 Pro Max នឹងមកដល់នៅថ្ងៃទី១៨ ដល់ថ្ងៃទី២៥ ខែតុលា ។

លើសពីនេះទៅទៀត​​ អតិថិជនភាគច្រើន​ ត្រូវរងចាំរហូតដល់​ខែវិច្ឆិកាឯណោះទើបទទួលបានទូរស័ព្ទ ខណៈអ្នកលក់វិញបានប្រាប់ថា iPhone 15 Pro Max ទំហំ ២៥៦ ជីហ្គាបៃ និង ៥១២ ជីហ្គាបៃ គ្រប់ពណ៌ទាំងអស់ គឺពេញនិយមបំផុត ។

គួរបញ្ជាក់ថា ក្រុមហ៊ុន Apple នឹងដាក់លក់ទូរស័ព្ទ iPhone ត្រកូល ១៥ ចំនួន ៤ ស៊េរីនៅក្នុងប្រទេសវៀតណាម ចាប់ពីថ្ងៃទី២៩ ខែកញ្ញា ជាមួយនឹងតម្លៃចាប់ពី ៩៤៥ ដុល្លារដល់ជិត ២,០០០ ដុល្លារ ៕

ប្រែសម្រួល៖ នាង រតនៈ

ប្រភព៖​ VN Express

ចុចអាន៖ ពលរដ្ឋ វៀតណាម ត្រូវខំធ្វើការពី ៣ ទៅ ៤ ខែ ទើបគ្រប់លុយទិញ iPhone 15 Pro