រុស្ស៊ី ចង្អុលចំឈ្មោះ ២ប្រទេសនៅអាស៊ី ដែលអាចចូលរួមជាមួយ អង្គការណាតូ

សមាជិកសភារុស្ស៊ីម្នាក់ បានលើកឡើងកាលពីថ្ងៃចន្ទទី២៥ខែកញ្ញាថា នៅចុងទសវត្សរ៍នេះ អង្គការណាតូ អាចចាប់ផ្តើមរលកថ្មីនៃការពង្រីកខ្លួន ដោយទទួលយកសមាជិកបន្ថែមនៅអាស៊ី ដើម្បីបង្កើនការប្រឈមមុខដាក់គ្នាជាមួយមហាអំណាចក្នុងតំបន់មួយចំនួន ដែលមានទំនោរប្រឆាំងនឹងគោលនយោបាយការបរទេសរបស់ទីក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧត្តមសេនីយ៍ Viktor Sobolev សមាជិកនៃបក្សកុម្មុយនិស្តរុស្ស៊ីនិយាយថា “ប្លុកយោធាដែលដឹកនាំដោយសហរដ្ឋអាមេរិកមួយនេះ អាចដាក់បញ្ចូលប្រទេសជប៉ុននិងកូរ៉េខាងត្បូង។ វា​ច្បាស់​ណាស់​ដែល​ថា លោក​ខាង​លិច​បាន​កំណត់គោលដៅ សម្រាប់​ការ​ធ្វើយោធូបនីយកម្មនៅ​អាស៊ី។ អាមេរិក​នឹង​ធ្វើ​គ្រប់​យ៉ាង​ក្នុង​អំណាច​របស់​ខ្លួន ​ដើម្បីអូសទាញប្រទេស​ទាំង​ពីរ ​ឲ្យ​ចូល​ក្នុង​ប្លុកនេះ ​ដើម្បី​ដាក់​សម្ពាធ​លើ​រុស្ស៊ី ចិន និង​កូរ៉េខាង​ជើង”។

លោកបន្តថា “ជាក់ស្តែង វាមិនអាចកើតឡើងភ្លាមៗក្នុងរយៈពេល២ទៅ៣ឆ្នាំខាងមុខបានទេ ប៉ុន្តែលទ្ធផលបែបនេះ អាចជឿជាក់បានក្នុងរយៈពេល៥ឆ្នាំ។ ថ្នាក់ដឹកនាំនយោបាយ និងយោធារបស់យើង ត្រូវតែយកចិត្តទុកដាក់ឲ្យមែនទែន ព្រោះរឿងនេះគឺជាការគំរាមកំហែងជាក់ស្តែងដោយឥតលាក់លៀម”។

ការអត្ថាធិប្បាយរបស់លោក Sobolev ធ្វើឡើង បន្ទាប់ពីរដ្ឋមន្ត្រីការបរទេសរុស្ស៊ី លោក Sergey Lavrov និយាយកាលពីដើមខែនេះថា អង្គការណាតូ កំពុងព្យាយាមដាក់កម្លាំងនិងហេដ្ឋារចនាសម្ព័ន្ធយោធារបស់ខ្លួន នៅតំបន់អាស៊ីប៉ាស៊ីហ្វិក ក្នុងគោលបំណងកំញើញមហាអំណាចក្នុងតំបន់។

ដោយឡែក កាលពីខែសីហា ប្រធានាធិបតីរុស្ស៊ី លោក វ្ល៉ាឌីមៀរ ពូទីន ក៏បានលើកឡើងផងដែរថា នៅទីបំផុត សម្ព័ន្ធភាពដែលដឹកនាំដោយសហរដ្ឋអាមេរិកមួយនេះ អាចច្របាច់បញ្ចូលគ្នាជាមួយ AUKUS ដែលជាកតិកាសញ្ញាសន្តិសុខក្នុងតំបន់ ប្រកាសជាលើកដំបូងដោយអូស្ត្រាលី អង់គ្លេស និងសហរដ្ឋអាមេរិកក្នុងឆ្នាំ២០២១ ចំពេលមានភាពតានតឹងកាន់តែខ្លាំងឡើងរវាងលោកខាងលិច និងប្រទេសចិន៕

ប្រែសម្រួល៖ Vann Vann

ប្រភព៖ RT

ចុចអាន៖ ពូទីន៖ ណាតូ អាចពង្រីកផែនការនៅអាស៊ី ដើម្បីបម្រើតម្រូវការ របស់អាមេរិក