សហរដ្ឋអាមេរិក ទទួលស្គាល់កោះប៉ាស៊ីហ្វិកចំនួន២ ជាផ្លូវការ ដើម្បីទប់ទល់ ចិន

កាលពីថ្ងៃចន្ទទី២៥ខែកញ្ញា ប្រធានាធិបតីអាមេរិកលោក ចូ បៃដិន បានប្រកាសទទួលស្គាល់កោះប៉ាស៊ីហ្វិកតូចចំនួន២ ជាផ្លូវការ ដើម្បីទប់ទល់នឹងឥទ្ធិពលរបស់ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក បៃដិន, ទីក្រុងវ៉ាស៊ីនតោន បានទទួលស្គាល់កោះ Cook និង Niue ជារដ្ឋ អធិបតេយ្យ និងឯករាជ្យ ហើយនឹងបង្កើតទំនាក់ទំនងការទូត ជាមួយកោះទាំងពីរ។

លោក បៃដិន និយាយថា ទង្វើនេះនឹងជួយរក្សាឲ្យតំបន់ឥណ្ឌូប៉ាស៊ីហ្វិក សេរីនិងបើកចំហ។ លោកបន្ថែមថា កិច្ចព្រមព្រៀងទទួលស្គាល់កោះទាំងពីរនេះ ក៏នឹងជួយទប់ស្កាត់ការនេសាទខុសច្បាប់ ដោះស្រាយបម្រែបម្រួលអាកាសធាតុនៅក្នុងតំបន់ដែលងាយរងគ្រោះ និងជំរុញកំណើនសេដ្ឋកិច្ចផងដែរ។

កោះ Cook និង Niue មានប្រជាជនសរុបតិចជាង ២០០០០នាក់ប៉ុណ្ណោះ ប៉ុន្តែបង្កើតបានជាតំបន់សេដ្ឋកិច្ចដ៏ធំនៅប៉ាស៊ីហ្វិកខាងត្បូង។

កោះទាំងពីរ គឺជាដែនដីដែលគ្រប់គ្រងដោយខ្លួនឯង នៅក្នុងសមាគមសេរី ជាមួយនូវែលសេឡង់ ដែលនេះមានន័យថា គោលនយោបាយការបរទេសនិងការពាររបស់ពួកគេ គឺត្រូវបានចងភ្ជាប់ជាមួយទីក្រុង វែលីងតោន ក្នុងកម្រិតផ្សេងៗគ្នា។

អស់រយៈពេលរាប់ទសវត្សរ៍មកហើយ តំបន់ប៉ាស៊ីហ្វិកខាងត្បូង បានក្លាយជាសង្វៀនដ៏សំខាន់មួយ សម្រាប់ការប្រកួតប្រជែងរវាងសហរដ្ឋអាមេរិក និងចិន។

លើសពីនេះ ទីក្រុងប៉េកាំង បានបង្កើនការបោះជំហានសេដ្ឋកិច្ច នយោបាយ និងយោធារបស់ខ្លួនយ៉ាងធំនៅក្នុងតំបន់មហាសមុទ្រយុទ្ធសាស្ត្រទៀតផង៕

ប្រែសម្រួល៖ Vann Vann

ប្រភព៖ DW

ចុចអាន៖ តាំងពីឡើងកាន់តំណែង លោក បៃដិន ទើបធ្វើដំណើរមកអាស៊ីអាគ្នេយ៍តែ ៣ប្រទេសប៉ុណ្ណោះ