ឆ្មាំឆ្នេរ ហ្វីលីពីន កាត់ “របាំងបណ្ដែតទឹក” ប្រវែង ៣០០ ម៉ែត្រនៅសមុទ្រចិន​ខាងត្បូង ចេញដោយជោគជ័យ

ឆ្មាំឆ្នេរសមុទ្រហ្វីលីពីនបានបើកប្រតិបត្តិការពិសេសមួយកាត់របាំងបណ្តែតទឹកប្រវែង ៣០០ ម៉ែត្រចេញដោយជោគជ័យ បន្ទាប់ពីត្រូវបានដំឡើងដោយប្រទេសចិន នៅជិតតំបន់ថ្មប៉ះប្រះទឹក Scarborough ដែលមានជម្លោះក្នុងសមុទ្រចិនខាងត្បូង ។

ទីប្រឹក្សាសន្តិសុខជាតិហ្វីលីពីនលោក Eduardo Ano កាលពីថ្ងៃចន្ទបានបញ្ជាឲ្យឆ្មាំឆ្នេរសមុទ្រដករបាំងនេះចេញ ដោយសារតែរបាំងនេះកំពុងបិទច្រកចូលតំបន់ថ្មប៉ប្រះទឹក ហើយបង្កគ្រោះថ្នាក់ដល់ទូកនេសាទហ្វីលីពីន ជាពិសេសការដំឡើងនេះគឺជាការរំលោភបំពាន់ច្បាប់អន្តរជាតិ ។

ស្របពេលជាមួយគ្នានេះ ឆ្មាំឆ្នេរសមុទ្រហ្វីលីពីនបានបញ្ជាក់ទៀតថា រាល់សកម្មភាពណាមួយដែលរារាំងដល់ការចិញ្ចឹមជីវិតរបស់ប្រជានេសាទហ្វីលីពីន គឺជាការបំពានច្បាប់អន្តរជាតិ និងអធិបតេយ្យភាពរបស់ប្រទេស ។

ដែនទឹកជុំវិញតំបន់ថ្មប៉ប្រះទឹកនេះត្រូវបានគេស្គាល់ថាជាច្រកនេសាទដ៏សម្បូរបែប ហើយមានទីតាំងនៅក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន ប៉ុន្តែតំបន់ទាំងនេះស្ថិតនៅក្រោមការគ្រប់គ្រងពេញលេញរបស់ប្រទេសចិន ចាប់តាំងពីឆ្នាំ ២០១២ មកម្ល៉េះ ។

ទោះយ៉ាងណា យោងតាមសេចក្តីសម្រេចឆ្នាំ ២០១៦ ដោយតុលាការអាជ្ញាកណ្តាលអន្តរជាតិបានទទួលស្គាល់ថាប្រទេសចិនបានរំលោភលើសិទ្ធិនេសាទរបស់ប្រជានេសាទហ្វីលីពីន ។ ប៉ុន្តែក្រសួងការបរទេសចិនបានឆ្លើយតបវិញថា តំបន់ទាំងនេះគឺជា “ទឹកដីរបស់ប្រទេសចិន” ជាពិសេសរដ្ឋាភិបាលទីក្រុងប៉េកាំងមាន “អធិបតេយ្យភាពដែលមិនអាចប្រកែកបាន” លើតំបន់ទាំងនេះ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹងប្រាក់ឈ្នួលក្នុងមួយខែរបស់កម្មករនៅ ឡាវ