កូរ៉េខាងជើង បើកព្រំដែនទទួលអ្នកទេសចរចូលប្រទេសឡើងវិញ ក្រោយ​បិទ ៣ ឆ្នាំ

កូរ៉េខាងជើងបានចាប់ផ្តើមអនុញ្ញាតឲ្យជនបរទេសធ្វើដំណើរចូលទៅក្នុងប្រទេសរបស់ខ្លួនបានវិញហើយ ហើយនេះក៏ជាជំហានបន្ធូរបន្ថយការគ្រប់គ្រងព្រំដែនដ៏តឹងរ៉ឹងរបស់ប្រទេស បន្ទាប់ពីការរឹតបន្តឹងដើម្បីទប់ទល់នឹងការផ្ទុះឡើងជំងឺកូវីដ ១៩ ។ ទោះយ៉ាងណា អ្នកដំណើរទាំងនោះក៏នឹងត្រូវដាក់ឲ្យនៅដាច់ដោយឡែករយៈពេល ២ ថ្ងៃផងដែរ នៅពេលចូលមកដល់ប្រទេសកូរ៉េខាងជើង ។

ប្រទេសកូរ៉េខាងជើងបានអនុវត្តការគ្រប់គ្រងព្រំដែនដើម្បីការពាររីករាលដាលនៃជំងឺកូវីដ ១៩ នៅខែមករា ឆ្នាំ ២០២០ ប៉ុន្តែថ្មីៗនេះ រដ្ឋាភិបាលទីក្រុងព្យុងយ៉ាងបាននឹងកំពុងដកការរឹតបន្តឹងជាដំណាក់កាល ជាពិសេសថែមទាំងបានបញ្ជូនគណៈប្រតិភូអត្តពលិកជិត ២០០ នាក់ទៅចូលរួមព្រឹត្តិការណ៍ Asian Games នៅប្រទេសចិនផងដែរ ។

ពាក់ព័ន្ធនឹងបញ្ហានេះដែរ កាលពីថ្ងៃព្រហស្បតិ៍សប្តាហ៍មុន បេសកជនចិនប្រចាំនៅទីក្រុងព្យុងយ៉ាងក៏បានជួបពិភាក្សាជាមួយមន្ត្រីទេសចរណ៍កូរ៉េខាងជើងផងដែរ ដោយសម្តែងក្តីសង្ឃឹមថា កូរ៉េខាងជើងនឹងបើកការធ្វើដំណើររវាងប្រទេសនានាឲ្យមានភាពប្រក្រតីឡើងវិញក្នុងពេលឆាប់ៗនេះ ។

ម្យ៉ាងទៀតកាលពីពេលថ្មីៗនេះមេដឹកនាំកូរ៉េខាងជើងលោក គីម ជុងអ៊ុន ក៏បានធ្វើទស្សនកិច្ចទៅកាន់ប្រទេសរុស្ស៊ីជាលើកដំបូងក្នុងរយៈពេល ៤ ឆ្នាំ ខណៈក្នុងដំណើរនោះ ទីក្រុងព្យុងយ៉ាងបានសន្យាពង្រីកទំនាក់ទំនងសេដ្ឋកិច្ចជាមួយរុស្ស៊ី ។

គួរបញ្ជាក់ថា សេដ្ឋកិច្ច​របស់​កូរ៉េ​ខាង​ជើង​បាន​រង​នូវ​ការ​ដាក់​ទណ្ឌកម្ម​ជា​បន្តបន្ទាប់ ហើយជាក់ស្តែង ទីក្រុងព្យុងយ៉ាងចង់ជំរុញការធ្វើដំណើររវាងប្រទេសកូរ៉េខាងជើង និងសម្ព័ន្ធមិត្ត ដូចជាប្រទេសចិន និងរុស្ស៊ី ក្នុងគោលបំណងដើម្បីស្តារកំណើនសេដ្ឋកិច្ចរបស់ប្រទេសឡើងវិញ និងដើម្បីទទួលបានរូបិយប័ណ្ណបរទេសផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង បញ្ជាក់ប្រាប់ កូរ៉េខាងត្បូង ថា ទំនាក់ទំនងជាមួយ រុស្ស៊ី ជារឿង ធម្មជាតិសម្រាប់ប្រទេសជិតខាង